100 насна өөнләнь йөрәв

Шидр Хальмг Таңһчин эрүл-менд харлһна министрин дарук Нахан Мария болн Целинн района муниципальн бүрдәцин һардврин элч Джунан Данара Төрскән харсгч Алдр дәәнә ветеран Болха Санджиевна Ашектаеваг 100 насна өөнләнь йөрәв.
Болха Санджиевна КАССР-ин Приозерн района Сарпа селәнд һарсмн. 1943 җилд эднә өрк-бүлиг цуг хальмг улсла әдл цааҗла харһулад, Новосибирск мүҗд йовулв. Тенд эн мал асрдг фермд көдлв. 1957 җилд төрскн һазртан нүүҗ ирәд, селәнә эдл-ахуд олн җилдән үнн-чик седклтәһәр көдлҗ, таңһчиннь делгрлтд ик тәвцән орулсмн. Баазра Бадм авальтаһан нәәмн үрән өскәд, цугтаднь чик сурһмҗ өгв. Олн үр һарһсн күүкд күн «Экин туурмҗ» гидг орденәр ачлгдсмн. Төрскән харсгч Алдр дәәнд Диилвр бәрснә өөнин медальмүдәр бас ачлгдад, Алдр Диилврин 80 җилин өөнд Целинн района күндтә иргнә нер зүүв.
Зун нас наслсн ээҗ эндр 26 ач-зееһиннь, 50 җич-зеенчиннь болн 7 җиликиннь кишгт багтҗ бәәнә. Әрәсән Президент Владимир Путин Болха Санджиевнаг зун насна өөнләнь йөрәһәд, бат эрүл-менд дурдв. Хальмг автономь бүрдәгдснә 105 җилин өөнин өмн өргнд 100 нас наслснь ээҗин җирһлин хаалһ төрскн һазр-уснаннь тууҗла бат залһлдата гиҗ гиичнр темдгләд, медәтд белг бәрүлҗ өгв.
БАТАН Сәәхлә