Нертә эмчин дөң-нөкдәр

Хальмг Таңһч зун тавн җил хооран бүрдәгдәд, эн җилмүдин эргцд харһсн күчр-күндиг дааһад, батрад делгрҗәнә. Сурһуль-эрдмин, сойлын, эрүл-менд харлһна, спортын болн нань чигн халх зун һар җилин туршарт күцәмҗтәһәр делгрҗ йовна. Таңһчин эрүл-менд харлһна делгрлтд ик тәвцән орулҗ, бәәрн улст өөдән чинртә дөң күргҗ, олн зүсн гемәс эдгәҗ йовх эмчнр дунд Настан Викторин нерн онц орман эзлнә.
Әрәсән эрүл-менд харлһна йилһән сән көдләч, Хальмг Таңһчин ачта эмч Настан Виктор тәвн шаху җилдән көдлҗ, кесг күүнә әм аврҗ, баһ наста эмчнрлә байн дамшлтарн хувалцҗ, эндр күртл күцәмҗтәһәр үүлдҗ йовна. Бийнь эн өнр-өсклң өрк-бүлд өссмн. Эк-эцкнь эгл улс билә, арвн хойр үрндән чик сурһмҗ өгч, эдндән үлгүр болдмн. Витя бичкнәсн авн җолач эс гиҗ механизатор болхар сандг бәәсмн, болв багш Лидия Андреевна Севастьянован сүв-селвгәр эн эмчин эрдм шүүҗ авв. Сурһулян төгсәснә хөөн эн Ростовск медицинск ик сурһульд орад, терүг төгсәснә хөөн таңһчин эмнлһнд күч-көлснә хаалһан эклсмн. Настан Виктор дамшлтта эмч Манҗин Дамбан һардврт төлҗәд, күүкд улсин эрүл-менд харлһна болн эмнлһнә халхд гүн медрл хоршав. Эн Хазн балһснд ординатурт сурад, күүкд улсин эрүл-менд харлһна халхар мергҗлтән өөдлүлв. Виктор Хулхачиевич Элстд нилхд төрлһнә Герт арвн дөрвн җилдән көдләд, кесг күүкд улст цаһан төр болхд нөкд болсмн.
Дәкәд Настан Виктор хөрн тавн җилдән П.Жемчуевин нертә таңһчин эмнлһнә санавиацин багд көдләд, селәдин әмтнд түргн дөң күргҗ кесг күүнә әм аврсмн. Зәрмдән хур эс гиҗ цасн икәр орхла, селәдт күрх хаалһ уга болад эмч йовһар чигн күрәд, күүкд улст дөңгән күргҗ йовсмн. Нег дәкҗ Хар Һазра районд күүкд күн цаһан төр болҗ чадлго зовад, әәмшг учрв. Элстәс эмчнриг дуудад, бачм дөң күргх шиидвр авгдсмн. Настан Виктор дарунь тиигәрән һарч йовад, күүкд күүнд нөкд болв.
Арвн шаху җил хооран таңһчин эмнлһнд гүлгн гемәс хөрлһнә әңг секгдхлә, байн дамшлтта болн өөдән мергҗлттә эмч Настан Викторт тенд көдлх үрвр кегдв. Өдр болһн гилтә эн месллһ кеҗ, күүкд улсиг әәмшгтә гемәс эдгәҗ авхин төлә сән чинртә эмнлһ күцәнә. Энүнә хәләврт эмнлһ авсн күүкд улс болн хамдан көдлҗәдг үүрмүднь Виктор Хулхачиевич цаһан седклтә, әмтнлә тевчңгү, җөөлн заңта, бат авцта күн гиҗ темдглнә.
1999 җилд Франц орн-нутгт бәәдг хальмг күүкд күн Мишель Ванькинән седвәрәр мана таңһчас Хоньна Валерий, Настан Виктор, Шовуна Владимир болн Владимир Балашов Ренн балһснд дамшлт хоршала. Бүкл сардан хальмг эмчнр бәәрн үүрмүдин дамшлтла таньлдҗ, мергҗлтән өөдлүлсмн. Келхд, сурһуль сурчасн цагтан немш кел дассн Виктор Хулхачиевич хол хаалһд йовхиннь өмн франц кел дассмн.
Тәвн шаху җилдән таңһчин эрүл-менд харлһна халхар көдлҗәдг Настан Виктор баахн эмчнрт үлгүр-үзмҗ болҗ йовна.

ДООҖАН Наталья