Көдлмшән дигтә-даратаһар бүрдәнә

Така сарин 6-д Әрәсән Росгвардин заллтын финансин әңгин көдләчнр сән Өдрән темдглхмн. Эн цергллтин тууҗ экономистнрин, тоочнрин көдлмшлә батар залһлдата болна.
Таңһчин Росгвардин заллтын хазна-экономикин әңгин һардач-ах тооч, полицин подполковник Жанна Муева эн халхар һучн тавн җилдән көдлҗәнә. Жанна Ольдаевна Көтчнрә района Чкаловский селәнд һарсмн. Бичкнәсн авн ухата, шулун-шудрмг, дааврта күүкн болҗ өсв. Келхәс, Жанна Ольдаевна тавн күүктә өрк-бүлд һурвдгчнь болна. 1978 җилд Чкаловский селәнә дунд сурһульд орад, тенд хойр класс төгсәв. 1980 җилд болхла эк-эцктәһән, эгчнртәһән болн дү күүкдтәһән Целинн района Троицкое селәнд нүүҗ ирв. Энд Жанна арвн классан төгсәсн болдг. Дунд классмудт сурчасн цагт Жанна эсвин кичәләр соньмсв. Тегәд сурһулян төгсәһәд, Элстин кооперативн техникумд орҗ сурв. 1990 җилд хату цаасан авад, Сбербанкин Целинн района әңгд тоочар күч-көлснә хаалһан эклв. Тенд хамдан көдлҗәдг ах үүрмүднь тоочин көдлмшин тускар тодрхаһар цәәлһҗ өгв. Эндр күртл Жанна эднлә залһлда бәрҗ, цол учрхла теднлә харһна.
Арвн һурвн җилдән Сбербанкин әңгд дамшлт хоршаһад, терүнә дару цаг зуур Хальмгин УФСИН-ә халхар тоочар эн көдлв. 2003 җиләс авн болхла таңһчин дотр-дундын кергүдин министерствд көдлдг болв. Тенд көдлн бәәҗ, Жанна Санкт-Петербург балһсна экономикин болн заллтын ик сурһуль төгсәсмн. 2016 җилд Әрәсән Президент Владимир Путинә седвәрәр мана орн-нутгт Росгвардин заллт бүрдәгдв. Тер җил МВД-н медлд бәәсн кесг әңгүд Росгвардин ханьд орсмн. Дамшлтта тооч Жанна Муевад Росгвардин заллтд ирҗ көдлх үрвр кегдв. Жанна Ольдаевна тер дарунь гилтә зөвән өгв. Тер җилд дамшлтта тооч Хальмг ик сурһулиг төгсәһәд, юрист болв.
Эндр Жанна Муева Росгвардин заллтын хазна-экономикин әңгиг чадмгар һардна. Хамдан көдлҗәдг үүрмүд дунд эн күндллһ болн тоомср олв. Хазна көдләчнр җилд кесг дәкҗ тооцаһан кенә. Баахн мергҗлтнрлә дамшлтарн хувалцҗ, көдлмшән хамдан цаг-болзгтнь эдн күцәнә.
Альднь чигн Жанна Ольдаевна дааврта көдләч болад бийән сән таласнь үзүлҗ йовна. Көдлмшән чинртәһәр күцәсн деерән Жанна Муева Росгвардин заллтын олна бәәдл-җирһлд шунмһаһар орлцна, гиҗ келх кергтә. Зөв-йос харлһна халхар олн җилдән үнн-чик седклтәһәр көдлҗәдг Жанна Муева МВД-н болн Росгвардин Күндллһнә кесг һашгудар болн Ханлтын бичгүдәр темдглгдсмн.
Дааврта һардач болсн деерән гертән болхла, Жанна Ольдаевна Араш Эрдниевич авальтаһан хамдан хойр көвү өскәд, сән сурһуль болн чик сурһмҗ өгв. Темдглхд, авальнь болн хойр көвүнь бас зөв-йос харлһна халхар көдлҗәнә. Ууһн үрнь гертә-малта, хойр күүк өскчәнә. Хойр ач күүкндән Жанна йир дурта. Байрин болн ончта өдрмүдлә эдн хамдан цуглрҗ, цаган сергмҗтәһәр давулна.
Полицин подполковник Жанна Муеван келсәр, күн болһн өөрхн элгн-садтаһан, үүрмүдтәһән ниитәһәр бәәхлә, көдлмш чигн сән йовудтаһар күцәгддг болна. Өөрдҗәдг Росгвардин хазна көдләчин сән Өдрлә хамдан көдлҗәдг үүрмүдән йөрәҗ, цугтаднь цаһан хаалһ эн дурдҗана.

КАРСАНА Евгения
Зургт: Жанна Муева (тал дунднь) хамдан көдлҗәдг үүрмүдтәһән