«Медрлин» мөрә авхар зүткҗәнә

«Медрл» ниицәнә мөрә авхин төлә Әрәсән цуг регионмудас 10 миңһн эрлһн орҗ ирсн бәәнә, тедн дунд Хальмг Таңһчас 18 күн йовна. «Медрл.Мөрә» гидг төсвд орлцхин төлә һаха сар күртл эрлһән орулҗ өгх кергтә. Шидр «Медрл» ниицән эн төсвд орлцҗадг регионмудын то-диг барлв.
«Төрскән харсачнрин залу-зөрмгин санл хадһллһнд тәвцән орулсн төлә» болн «Сурһуль-эрдмин бүрдәцд гегәрлтин үүлдврин төлә» гидг әңгүдт мана таңһчин элчнр шунмһаһар орлцҗана. «Сойл болн билг-эрдм» халхд гегәрлтин үүлдврт тәвцән орулсн төлә» гидг әңгд мана таңһчас Басңга Баатрин нертә Келн-улсин театрин артистк Бадмин Карина орлцҗана. Эн бичкдүдин болн бөдүн улсин театральн студьд багшлна. Карина Батовна театрин улд кичәлмүд давулҗ, тәәз деер бийән бәрлһнә, кел өргҗүллһнә болн нань чигн дамшлт хоршалһна туст нөкд болна. Багмудт 20 күн орна, эдн дару-дарунь тәәз деер һарч, олн нааддт орлцна. Удл уга театрт бөдүн улсин багин наадн үзүлгдхмн, бичкдүд бас билг-эрдмәрн байрлулҗана, тегәд Бадмин Каринан көтлвр күцәмҗтә болҗахиг эдн иткүлҗәнә.
Хальмг Таңһчин элчнр түрүн болҗ эн төсвд орлцсна сертификат авхмн, эдниг региональн ачлврар темдглхмн. Орн-нутгин төсвин дииләчнриг шинҗләчнрин хүүв йилһҗ авх болв. Келхд, эн хүүвин ханьд мана таңһчин элчнр бас орхмн, эннь шаңһа үүлдәчнр, номтнр, бүрдәцсин һардачнр, баһчудын ниицәсин элчнр болн нань чигн мергҗлтнр мөн. «Медрл.Мөрә» гидг төсвин дииләчнриг Москва балһснд болх байрин керг-үүлдврт ачлҗ йөрәхмн.
БАТАН Наталья