Непалын, Шри-Ланкан, Мьянман баһчудла күүндәд

Хальмг Таңһчин сән Өдрлә ирлцҗ, Б.Б.Городовиковин нертә баһчудын Герт Непал орн-нутгин Әрәсән элчллтд бүрдәгдсн видеозалһлдана йовудт нег һазра мана баһчуд орлцв. Тер мет Шри-Ланкан болн Мьянман элчнр терүнд бас орлцсинь темдглх кергтә.
Харһлтын эклцәр Хальмг автономин туск фильм үзүлгдв. Терүнә дару баһчудын кергүдәр бәәдг Агентствин һардачин дарук Алексей Бердунов ирлцңгү политикин, сурһуль-эрдмин, волонтермудын җисәнә делгрлтин төрмүдиг босхад, намртан Элстд болх шар шаҗна нарт-делкән хургт орлцх үрвр кев.
Тодлхас, 2024 җилин чилгчәр Хальмгин Толһач Хаска Бату Мьянман орн-нутгт одсн билә. Тиигхд Мьянман болн Хальмг Таңһчин хоорнд кесг бооцас батлгдв. Эн җилин хөн сард болхла таңһчин Толһач Непалд одв. Сурһуль-эрдмин, сойлын болн зуульчллһна халхсар нөкцлтхәр шиидсмн. Тер мет Шри-Ланкан элч Шобини Гунасекерала Хаска Бату бас харһад, кесг төрмүдәр күүндсн билә.
– Шри-Ланкан болн Мьянман элчнр цугтан видеозалһлданд орлцҗ чадсн уга. Зуг цааранднь залһлдаһан делгрүләд, нөкцлтхәр үгцвидн, – гиҗ Алексей Бердунов темдглв.

ОЛЬДАН Цаһан