Өвкнрин туурмҗин темдг болад

Хальмг Таңһчин сән Өдрлә ирлцүлҗ, «Орс һазр» саңгин президент Анна Данилова үүдәсн «Төрскән харсгч Алдр дәәнд хальмг улсин тәвц» нертә торһн көк альчур Элстд илгәгдв. Эннь «Диилврин көк альчур» нарт-делкән керг-үүлдврин нег әңгнь болв.
Альчурт көк теңгрин, хальмг өргн теегин зургуд орулгдҗ. Тал дунднь 1943 җилд Элст балһс сулдхлһна темдг болҗадг Диилврин Улан туг делсчәнә. Тер мет альчурт Хальмгин тууҗд алтн үзгүдәр бичгдҗ орсн улсин зургуднь бәәнә. Тедн дунд Б.Б.Городовиков, Делгә Эрднь, Наталья Качуевская, Михаил Кондаков, Владимир Никаноров болн Манҗин Булда мөн. Энүнәс нань альчурт Хулхт селәнд бәәдг 28 Әәрмин санл тевчҗ босхгдсн бумблв болн Иргнә болн Төрскән харсгч Алдр дәәнд орлцачнрин санл мөңкрүлсн Элстин бумблвс бас зургдсмн.
– Өвкнрин туурмҗин туск санл хадһллһн эн керг-үүлдврин һол күслнь болна. «Орс һазр» саңд болн Анна Даниловад эн чинртә төсв күцәҗәхд ик ханлтан өргҗәнәв, – гиҗ Хальмгин Толһач Хаска Бату темдглв.
Анна Данилован келсәр, эн чинртә төсв күцәлһн өвкнрин залу-зөргинь, туурмҗинь темдглҗәдг мөн. Эн альчур кен-негнәннь төлә бас нег кеермҗ болв гив.
КАРСАНА Евгения