Ончта өөнән темдглсн ачта аав

Шидр Октябрьск района Хошуд селәнд бәәдг медәт Саңһҗ-Һәрән Петр 95 насна өөнән темдглв. Насн-җирһлиннь туршарт төрскн һазр-уснаннь делгрлтин төлә үнн кевәр көдлҗ, зурһан үрндән чик сурһмҗ өгсн аавиг ончта өөнләнь йөрәхәр района толһач Увшан Басң, таңһчин йиртмҗин көрңгин министрин үүл дааҗадг Һооҗура Санл, нег һазра улс болн элгн-саднь ирв.

Петр Басангович 1930 җилин така сарин 1-д Хошуд селәнд өнр-өсклң өрк-бүлд һарсмн. Төрскән харсгч Алдр дән эклхлә Дорҗ ахнь түрүн зергләнд фронтд одв. Эн Сталинградск ик бәрлдәнд орлцад, залу-зөрмг кевәр дәәлдҗ йовсмн. 1943 җилд хальмг улсиг цааҗла харһулад, төрскн һазраснь Сиврүр туув. Саңһҗ-Һәрән Петрин өрк-бүл Красноярск крайин Ужурск районд тусв. Эцкнь эднән өнчрүләд, сәәһән хәәв, ахнь фронтд йовсмн, тегәд арвн дөрвтә Петр экдән нөкд болхар экләд көдлв. Эн Учумск тохма мал асрдг эдл-ахуд мөрчәр көдләд, өрк-бүлән теҗәдг болв. Көвүн бичкн болв чигн көдлмштән һавшун, дааврта бәәсмн, тегәд 1949 җилд энүг хөөчнрин бригадирт батлв. Сиврин улс дунд хальмг баахн көвүн нер һарч күцәмҗ бәрв. Төрскн һазрурн хәртлән Саңһҗ-Һәрән Петр малд көдлв.
Сиврин һазрт эн гертә-малта болв. Хадкүүкн Манджиевна авальтаһан эдн зурһан үрән өскәд, далн хойр җилдән ниитә бәәв. Төрскн һазрурн нүүҗ ирәд, Петр Басангович малын эмчәр, малчар олн җилдән көдләд, селәнә эдл- ахун делгрлтд ик тәвцән орулсмн. Келхд, Саңһҗ-Һәрән Петр МЖС бүрдәлһнд ик нилчән күргсмн.
- Мана эцк цаһан седклтә, насн-җирһлиннь туршарт гүҗрҗ көдләд, өөрән бәәсн улст дөңгән күргхәр шунҗ, уга-яду улст зовҗ бәәсәрн хувалцҗ йовсмн. Худл бичә келтн, буру йовдл бичә һарһтн, үнн кевәр бәәтн, гиҗ маднд сурһмҗ өгдг бәәсмн. Чик авг-бәрцәр бәәхлә, кишг-буйн үүдх гиҗ келсн үгнь маднд заавр, эцкимдн герәсн болна. Мана эцк болн аав маднд үлгүр-үзмҗ болна, гиҗ Светлана күүкнь келнә.
Нидн авальнь насан барв, ода Петр Басангович Керүлчә күүктәһән хамдан бәәнә. Һундл төрхд, зурһан үрнәснь ода Светлана, Гиләш болн Керүлчә күүкднь бәәнә, һурвн көвүнь сәәһән хәәв. «Хальмг үнн» газетд олн җилдән көдлҗ йовсн энүнә көвүн нертә седкүлч Саңһҗ-Һәрән Иван эцкиннь сурһмҗар бас үнн-чик хәләцтә, көдлмштән һавшун, цаһан седклтә, үр-иньглгч күн бәәсмн. Эндр Петр Басанговичин 9 ач-зень болн 10 җич-зеенчнь эднә нер дуудулҗ, энүнә зааврар бәәхәр шунна.
«Хальмг үнн» газетин көдләчнр ач иктә Петр Басанговичиг ончта өөнләнь йөрәҗ, чидл-чииргнь чаңһрҗ, эрүл-менднь батрҗ, олн ачнр-зеенриннь болн җичнриннь кишгт багтҗ зу нас наслхиг дурдҗана.
ДООҖАН Наталья
Зургт: ачта медәт Саңһҗ-Һәрән Петр өөрхн элгн-садтаһан