Шаҗна ик хургт ик белдвр кегдҗәнә

Шидр Хальмг Таңһчин Улсин Хуралын (Парламентин) дарани сессь болв. Таңһчд ах федеральн инспектор Александр Беляев, Әрәсән Федерацин элч Байир Путеев, Хальмг Таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин, олна ниицәсин элчнр сүүрт орлцв. Депутатнр зуни амрлһндан һархин өмн 12 төр хәләһәд, таңһчин зәрм закадт сольвр орулв, олн үртә өрк-бүлин Өдр зарлв.
2024 җилд таңһчин болн эрк биш медицинск даатхлһна хазн ямр кевәр күцәгдснә, 2025 җилин болн 2026-2027 җилмүдин зуран хазна туск заканд сольвр оруллһна төрмүдәр Хальмг Таңһчин залврин Ахлачин негдгч дарук–таңһчин финансин министр Шурһчин Очр зәңгллһ кев. 2024 җилд таңһчин хазна оруһин әңг 29557713,7 миңһн арслң тогтав, терүнәснь 13961482,7 миңһн арслң алвна болн алвна биш мөңгн болв. Алвна мөңгиг амр кевәр өглһнә (УСН) туск закан батлгдсна ашт таңһчин хазнд орулгдсн мөңгнә кемҗән 24 процентд өсв. 2025 җилд таңһчин хазна оруһин болн һаруһин әңгүдт орн-нутгин хазнас немр 699548,5 миңһн арслң йилһгдҗәхәс иштә һурвн җилә хазна туск заканд сольвр орулх кергтә гиҗ Шурһчин Очр цәәлһв.
Эн намрар мана таңһчд болх шар шаҗна нарт-делкән ик хургт белдвр келһнә тускар Хальмг Таңһчин залврин Ахлачин негдгч дарук Цернә Эрднь тодрхаһар келҗ өгв. «Шар шаҗна делкә шин миңһдгч җилд» гидг ик хург Элстд һаха сарин 25-ас авн 28 күртл болхмн. Терүнә йовудт 50 һар керг-үүлдвр болхмн, һазадын орн-нутгудас ут тоодан 250 гиич ирхмн гиҗ күләгдҗәнә. Нарт-делкән ик хургт белдвр келһнә бүрдәмҗин комитетиг Хальмг Таңһчин Толһач Хаска Бату һардҗана. Эн керг-үүлдвр җирһлин үнтә зөөр харсч хадһлҗадг орн-нутг болҗадг Әрәсән чинриг нарт-делкәд батлх, Хальмг Таңһчин делгрлтиг урмдулх, олн шаҗна хоорнд залһлда делгрүлх күсл зүүҗәнә гиҗ Эрднь Николаевич темдглв. Һаха сарин 25-д шар шаҗна нарт-делкән чуулһн байрин бәәдлд секгдхмн. Эн өдрин бийднь Санкт-Петербург балһсна музеймүдт хадһлгдҗадг шар шаҗна билг-эрдмин үнтә зөөрин һәәхүл бүрдәгдхмн. «Шар шаҗна делкә шин миңһдгч җилд» гидг төрәр болх сүүрт шаҗна хувргудыг белдҗ сурһлһна, бурхн-шаҗна орн-нутгудын эмнлһнә иргчин, зуульчллһ делгрүллһнә, өдгә цагт баһчудын болн нань чигн чинртә төрмүдәр өргн күүндвр болхмн. Тер мет ик хургин йовудт «Бадм цецгин кубок», «Һурвн хурлын кубок» болн «Джангариад» спортивн керг-үүлдврмүд давулгдх, Бурхн Багшин Алтн сүмд һурвн эрдньд көгҗмәр белг бәрүллһнә нәр болхмн, миңһн һар домбрч терүнд орлцхмн. Ахнр-дүүнр болҗадг кесг региона үүдәгч коллективс ирҗ, иньгллтин концертд билг-эрдмән үзүлхмн. Нарт-делкән ик хургт белдвр кеҗ, хотл Элст балһснд болн цуг райодт сән кец-таал тогтаҗ, ясврин көдлмш кегдҗәнә, хаалһс болн гиичлүрмүд тосхгдҗана. Тиигәд, Элстд Манҗин Аркадин нертә талвң секгдхмн, Күндллһнә талвңд, Арбатд болн «Родина» сойлын төвин өөр сән таал тогтагдҗана, Хальмгин төв хурлд, таңһчин залврин Герт, концертин бәәрнд, «Ойрат-Арена» спортын бүрдәцд ясвр кегдҗәнә, гиҗ таңһчин залврин Ахлачин негдгч дарук келв.
«Хальмг Таңһчд һазрин хәрлцәг дигллһнә туск» таңһчин заканд сольвр орулгдснас иштә цергә шишлң керг-үүлдврт орлцад әмнәсн хаһцсн улсин өрк-бүлднь өңгәр һазрин әңг һарһгдх болв. Тер мет 35 нас күрәд уга сурһуль-эрдмин болн эрүл-менд харлһна көдләчнр бас тиим зөвтә болснь темдгтә. Хальмг Таңһчин күүкд улсин ниицәнә седвәриг дөңнәд, депутатнр олн үртә өрк-бүлин Өдр батлв. Терүг һаха сарин һурвдгч нарн өдрлә темдглх шиидвр авгдв.
Сессин чилгчәр Әрәсән Федерацин гешүн Байир Путеев тооцаһан өгәд, эн дааврта үүлд кесн көдлмшин тускар келҗ өгв.

ДООҖАН Наталья