Делкән гиичнриг тосхар

Эндр делкәд чинвртә олн йовдл учрҗана. Өөрхн Дорд үзгт, СВО-н керг-үүлдврт нам аврлт уга дәәлдән учрҗана, түүнәс сагллһна, тиим йовдлыг ууруллһна керг-үүлдвриг Әрәсә болн Китд, талдан чигн орн-нутгуд цуцрлтан угаһар күцәҗәнә, США-ла болн талдан чигн орн-нутгудла кеҗәх күүндврин ашт тиим дән-даҗгта бәәдлиг ууруллһна үүлдвр өргҗәд йовна.

Болв дәәлдә келһнә йовдл ода чигн уурулгдад уга. Эвин, дипломатин эв-арһар тиим чинвртә бәәдлиг уурулх седкл делкәд өсәд йовна, тер кергт Элстд болх нарт-делкән шар шаҗна хург чигн эврәннь тәвцән орулхнь лавта. Яһад гихлә кесг орн-нутгин залврин болн һардврин элчнр түүнд орлцх гиҗ күләгдҗәнә. Эднә келсн тоолвр, делкән орн-нутгудын оньгт тусхасн ик хургт орлцачнрин үг чинвртә бәәдлиг кесг тивд ууруллһнд нилчән күргәд бәәх гиҗ нәәлҗ болҗана.
Эндр эвиг харслһнд нерәдсн, альд болв чигн келгдсн үг цуг делкән цаһан саната улсин күчллһиг чаңһаҗ, теднә үүлдвриг цааранднь хамцуллһнд, делкәд эвин чидлин күчинь өөдлүлҗ дән-даҗг уга бәәлһнә җисәг батрулад бәәхнь лавта. Тиим кевәр Хальмг Таңһчд болх ик хург нарт-делкән ик чинр зүүҗәнә.
Түүнә тускар Элстд «Калмыкия» РИА-н барин төвд болсн брифингд орлцачнр, тер тоод таңһчин баһчудын кергәр бәәх агентствин һардачин дарук Алексей Бердунов келв. Элстин хургт кесг орн-нутгас күндтә гиичнр ирх гиҗ күләгдҗәнә. Ода бидн теднд үрвр келһнә, теднлә кесг халхар нөкцлтән күцәлһнә халхар белдврин ик көдлмш кеҗәнәвидн. Тер мет ик хургиг дигтә-даратаһар бүрдәхин төлә волонтермуд ик дөңгән күргх зөвтә. Теднә көдлмшин, күцәх кесг кергин тускар таднд тодрхаһар келҗ өгхәр бәәнәвидн гиҗ Алексей Александрович цәәлһв.
Дарунь күүндврт таңһчин «Движение первых» җисәнә һардач Анхана Саглр орлцв. «Эндр бидн волонтермудла бүрдәмҗин ик көдлмш күцәҗәнәвидн. Ода деерән 300 һар күн волонтер болҗ көдлх седклән медүлв. Болв тоод авлһн цааранднь болад бәәнә, таңһчин баһчудын бүрдәцсин болн шар шаҗна һурвдгч ик хургин сайтмудт бийиннь нер усан келҗ өгч, эрлһән орулҗ болҗана.
Арвн дөрвн наснас авн 70 нас күртл бидн волонтермудыг авнавидн, мана «Движение первых» җисәнә гешүд бас орҗ чадҗана. Эрлһән өгснә хөөн эдн шишлң сурһуль давҗ һарх, дәкәд ик хургт эднә аккредитац кегдх», – гиҗ Саглр Вячеславовна цәәлһвр өгв.
Орчулачнр бас кергтә, түүнә төлә бүрдәһәчнр сурһульмудын болн Хальмг ик сурһулин багшнриг ик хургт орлцулхар зуралҗана. 30 орн-нутгин элчнр Элстин шар шаҗна ик хургт орлцх гиҗ күләгдҗәнә.
Тер мет «Волонтермуд-эмчнр» гидг ВОД-ын КРО-н таңһчин зүүцүләч Җоҗан Инесса волонтермудын үүлдврин күцәх көдлмшин тускар келв. Ирсн нертә ламнр лекц умшх ормст болн спортын керг-үүлдвр болх талвңд волонтермуд хамгин түрүнд дөңгән күргәд бәәх, гиҗ Инесса Сергеевна темдглв.
Тер мет хот-хоолар, көлгн-күчәр тетклһнә, концертс бүрдәлһнә талвңгудт эдн дөңгән күргх, олна әәмшг уга бәәлһиг тетклһнд эдн бас орлцх. Волонтер болһн эврән күцәх көдлмшән шүүҗ авч чадҗана. Баһчудын цуг делкән наадмд орлцад ирсн көвүд-күүкд бас волонтермудын тоод орх.
Талдан һазрас, тер тоод Москваһас болн Санкт-Петербургас, Краснодарас, Севастополяс, Омскас, Удмуртин Республикәс болн кесг нань чигн регионмудас волонтермуд ирх гиҗ күләгдҗәнә, эдн цугтан общежитәр теткгдх, ик хург бүрдәлһнд дөң болҗах цуг баһчуд хот-хоолар болн көлгәр өңгәр теткгдх.
Цугтан эдн шишлң хувцта болх, ик хургин чилгчәр эднд бүрдәһәчнр белгүдән бәрүлҗ һашгудар ачлх. Волонтермудын ик зунь талдан чигн ик керг-үүлдвр бүрдәлһнд орлцсн дамшлтта баһчуд болҗана, эднә дөңгәр Элстин нарт-делкән ик хург дигтә-даратаһар болн ик тустаһар давх гиҗ лавтаһар ицҗ болҗана.
ТҮРВӘН Һуна