Хаалһ цаглань тосхгдх

Шидр Элст балһсна һардврин толһач Лиҗикә Алдр Чограйская уульнцд хаалһин тосхлтыг бүрткв. Хальмг Таңһчин Толһач Хаска Батун даалһврар хотл балһсна толһач тосхлтсин йовудыг бүрткҗ, цугнь сән чинртәһәр болн батлгдсн цаг-болзгт күцәгдхиг һол оньгтан бәрҗәнә.
- Элст балһсна ар-барун үзгт Чограйская уульнцд хату девскртә хаалһ тосхлһна көдлмш ик чинртә болҗана. Энд бәәдг миңһн һар күн хату девскртә хаалһ тосххиг сурад, эрлһс орулҗ өгсмн. Муниципальн бооцан цаглань күцәгдҗ, энд бәәдг әмтнд сән таал тогталһна төр яһҗ хаһлгдҗахиг эврән бүрткҗ хәләнәв. Ода деерән 740 метрт хаалһ кегдв, дәкәд 600 метрт кегдх көдлмш бас бәәнә. Хаалһин тосхлтын төсвд чиклвр орулгдсна ашт тосхлтын йовуд цаг-зуур зогсагдсн билә. Тосхачнр көдлмшән така сарин 31 күртл төгсәх зөвтә, - гиҗ Алдр Васильевич цәәлһв.
Тосхлтын бүрдәцин элчин темдглсәр, кергтә цуг тоот бәәнә, тегәд хату девскр углҗ тәвлһнә көдлмш дигтә-даратаһар күцәгдҗәнә.

БАТАН Сәәхлә