Чадмг цергчнр болхмн

Одахн Аһшин мүҗин харслтын-спортын «Авангард» лагерин ул деер «Зарница 2.0» гидг цергә-төрскнч наадн болв. Эн җилин марһанд зурһан өдрин эргцд Аһшин, Әәдрхнә, Ростовин мүҗсин, Хальмг Таңһчин, Адыгейин, Крымин , Краснодарск крайин, Севастополин, тер мет Донецк болн Луганск Улсин Республикүдин, Запорожск болн Херсонск мүҗсин 32 баг дөрлдв. Түүнә дииләчнр һаха сард Цугәрәсән марһанд чидлән сөрх. Хальмг сурһульчнр насна һурвн зергләнд ЮФО-н дөрлдәнд орлцв.

Тер тоод дунд багд В. Панченкон нертә Яшалта селәнә дунд сурһулин элчнр «Ясень - 01» багин ханьд орв. Эднә тооһас Нарн Семенов «Сапер» гидг дөрлдәнд 3-ч орм эзлв, командирмүд дундас 2-ч ормд Ульяна Кулявцева һарв. Тер мет тактикин белдврин бүкл багин дөрлдәнд Яшалтан сурһульчнр 3-ч ашан үзүлв.
Ах наста багд Зая-Пандитан нертә Хальмг этносойлын гимназин уйн настнр чидлән сөрв. Эдн «КЭГ-ин нарна сүүдр» гидг багин ханьд негдлә. Эврә онц зачетд командирмүдин даалһвр күцәҗ йовад, Карина Тугдумова 3-ч үзмҗд күрв. Болв хамгин өөдән ашиг Элстин гимназин элчнр Манҗин Юрий болн Чилгрә Владимир үзүлв – штурмовикүдин төлә онц даалһвр күцәснә хөөн эдн негдгч ормд һарв.
Шишлң багд Городовиковск балһсна олн салврта колледжин оютнр «Зурамтай эмтнр» гидг багин ханьд эв-дован сөрв. Тер тоод Мария Кривоногова болн Софья Жарихина эмнүләчнрин онц даалһврта марһанд хойрдгч ашт күрв. Бүкл баг орлцсн «Тактикин эмнлһн» гидг дөрлдәнд эдн хойрдгч үзмҗ үзүлв.
- «Зарница 2.0» наадна йовудт бидн кесг мүҗсин багмудла таньлдад, теднлә дөрлдсн бийнь, марһана хөөн йостаһар үүрлдг болвидн, кесг тоотыг теднә тускар медвидн, бийиннь тускар келҗ өгләвидн. Үлгүрнь лазертаг гидг нааднд орлцҗ, тер мет кесг станцар гүүлдәд цергә даалһвр күцәҗәсн чинвртә саамд Донецк балһсна болн нань чигн регионмудын багмудла таньлдвидн.
ЮФО-н марһан йир чинвртә болв. Түүнә хөөн болсн концерт маднд таасгдв, болв шин үүрмүдәсн салх кем бас ирв. Бидн цугтан диилх седкл зүүҗ, эврә чидлдән иткҗ, нег-негндән урмд өгчәләвидн, тиим чаңһ багмудла дөрлдхд чигн соньн болна, – гиҗ марһана дииләч Чилгрә Владимир тоолвран келв.
Ода эдн Манҗин Юрийлә хамдан Хальмг Таңһчин «Дәәч» төвин талвңд дамшач Шальдирә Җаңһрин һардврт Цугәрәсән марһанд белдҗәнә, төвин талдан чигн көдләчнр эднд дөң болҗана. Тиим кевәр эдн һаха сард Аһшин мүҗд болх Цугәрәсән «Зарница 2.0» ашлгч нааднд орлцҗ мана таңһчин нер харсх. Цергә билгтә Элстин КЭГ-ин гимназин көвүдт күцәмҗ дурдҗанавидн.
Цергә эв-дован сөрлһнә йовудт көвүд-күүкд «дәәч зер-зев олзллһн», «радиацин, химийин болн биологийин зер-зевәс бийән харслһн» гидг кичәлмүдин, җирһлин күнд таалд әмән аврлһна дамшуллһнд белдврән үзүлв. Тернь бас амр биш бәәсмн, кесг эв-арһан, медрлән олзлх кергтә болв.
- «Зарница 2.0» нааднд орлцачнрин, тер тоод мана таңһчин уйн наста цергчнрин белдврин кемҗән өсәд йовна. Кесгнь давсн җилин марһанд орлцҗ дамшлтан хоршала, тегәд эдн цугтан эвтә-довта дәәчнр болҗ өсх гиҗ лавтаһар келҗ болҗана. Эн наадна ул деер бидн бат ниицә тогтаҗанавидн, күүкд нег-негнтәһән таньлдад, шин үүрмүдән олад, дөрлдәнә таалд эврә белдврин кемҗәһән йилһҗ авна, - гиҗ таңһчин «Дәәч» төвин дамшач, таңһчин СВО-н ветеранмудын ниицәнә ахлач Чумуда Николай келв.
Цуг Әрәсәһәр һурвн сай күн сурһулин девсңд эн нааднд орлцв, теднәс хамгин сән арвтнр муниципальн болн таңһчин девсңгиг давҗ һарла. Тернь цуг күүкдт ик урмд өгнә. Хальмг Таңһчин элчнр ЮФО-н марһанд сән аштаһар орлцад өөдән белдврән үзүлв, тегәд чигн эднәс зәрмнь Цугәрәсән нааднд орлцх күндтә зөв авв. Дарук җилин дөрлдәнд эдн улм өөдән үзмҗд күрх гиҗ бат ицгтә бәәнәвидн.

ТҮРВӘН Һуна