Хальмг хувциг Моңһлд үзүлв

Така сарин 6-д Улан Баатр балһснд моңһл келтнрин хувц үзүллһнә керг-үүлдвр болв. Хальмг Таңһчин элч уяч Зинаида Четыреван үүдәсн шишлң хувцн үзүлгдснь темдгтә болв. Урҗ өдр «Калмыкия» РИА-н барин төвд энүнә тускар күүндвр болв.

Эрдмч Зинаида Четырева кесг җилдән хальмг келн-улсин хувц уйҗ һарһҗана. Сүл цагт нег һазра улс ик-бичкн уга хальмг улсин кев-янзта хувц уюлҗ өмснә. Энүнәс иштә Зинаида Алексеевна өдр болһн өмсдг шишлң хувц үүдәсн болдг.
Эн хувциг үүдәҗ уйхас урд Зинаида адһм угаһар тууҗин материалмуд, олн зүсн хуучн зургуд хәләҗ шинҗлв. Энүнә келсәр, мел мана өвкнрин хувцта әдлхн бүшмүд үүдәҗ һарһхар шунв.
– Улан Баатрт давсн керг-үүлдвр өөдән кемҗәнд бүрдәгдв. Сәәхн хувцта баһчуд йовсн тәәзин тал дунд ик бадм цецг углҗ тәвгдв. Олн зүсн өңгтә хувцта көвүд-күүкд әрүн цецг эргәд йовснь һәәхмҗтә йовдл болснь лавта. Хальмг улсин нертә артистк Очкан Анна дуулсн «Ээҗин дууна» айст авлгдҗ, хальмг улсин хувцн үзүлгдв, – гиҗ Зинаида Четырева темдглв.
Нүүдл улсин музейин һардач Саңһҗин Татьяна энүнлә хамдан Моңһлд одв. Татьяна Горяевна болн Моңһлд бәәдг нег һазра мана баһчуд ирәд, маднд нөкд болснд ик ханлтан өргҗәнәв, гиҗ Зинаида Четырева ашлв.

КАРСАНА Евгения