«Бодхин көгҗм» - иньгллтин байр

2025 җилин така сарин 6 өдр тууҗд орв. Бурхн Багшин номд шүтдг саяд улсин Оюни Көтлврч XIV Дала Ламин Гегәнә 90 җилин өөнд нерәдсн байрин ик керг-үүлдврмүд болсар тер өдр тодлгдхмн.
Бурятьд эн өдр Дала Ламин 90 җилин өөнд нерәдәд «Бодхин көгҗм» гидг нарт-делкән билг-эрдмин ик байр болв. Оперин болн балетын Бурятин шаңһа академическ театрин һоллгч тәәз деер наадмин концертс болв. Дала Ламин Гегәнд нерәдсн көгҗмин, дууна болн бииһин йөрәлән олн һазрас ирсн коллективс үзүлв. Бурятин, Тыван, Хальмгин болн Моңһлын үүдәгч коллективс үүлдврән хамцулад, Оюни Көтлврчд ик күндллһән медүлхәр зүткв. Байрин ик концерт Дала Ламин Гегәнд ут нас насллһнд нерәдсн мөргүләр эклсмн.
Хальмг Таңһчин ачта артистнр Орган Эрвена, Һәрән Лиҗ, Шаран Дмитрий, Хальмг Таңһчин улсин артистк Нәдвдә Ольга болн бичкн билгтнрин «Веснушки» ансамбль Хальмг Таңһчин нерн деерәс орлцв. Хальмг улсин сойлын кецү сәәхн зөөриг Хальмгин билгтнр йир сәәнәр үзүлҗ чадв. «Бодхин көгҗм» нарт-делкән шар шаҗна наадмд олн билгтнр болн үүдәгч коллективс Улан Удэ балһснд цуглрҗ ирсмн. Сойлын халхар темдгтә болсн эн билг-эрдмин хәләвр йоста иньгллтин байр болҗ цугтад тодлгдв.
Байрин эн ончта нәәрт орлцсн талдан артистнриг бас заахмн. «Байкал» бурят келн-улсин дууна болн бииһин ансамбль, «Амар сайн» гидг Забайкальск крайин дууна болн бииһин Келн-улсин театр, Тыва Республикин ачта артист Ишкин Оглу, Моңһлас «Эсэргэн» гидг бииһин баг эн байрт билг-эрдмән үзүлв. Бурятин ик сурһулин оютнрин үүдәгч коллективс, «Раздолье» гидг дууна болн бииһин улсин ансамбль, «Байкальские волны» гидг дууна болн бииһин улсин ансамбль, «Аядон» гидг этностудь ду-бииһән болн наадан цуглрсн әмтнд нерәдв. Бурятин нертә артистнр
Ринчин Дашицыренов, Дулма Сунрапова, Булад Бадмаев, Тимур Болотов, Цыден-Еши Бимбаев, Ольга Шарапова, Чингис Пурбуев болн нань чигн билгтнр наадмин керг-үүлдврмүдт орлцв.
Байрин ик концертд билг-эрдмән үзүлсн деерән «Веснушки» ансамбльд Хальмг Таңһчин ачта артист Һәрән Лиҗлә хамдан «Ёхорин сө» гидг наадмд орлцх хөв учрв. Бурят улсин хамгин дурта эн наадм Хальмгин бичкн артистнрт икәр таасгдв. «Шарка Барка» болн «Җора Мөрн» гидг хальмг улсин би бурятнрин оньгт тусхагдв.
Олн күн орлцҗ, эргҗ биилдг «Ёхорт» хальмг бичкн артистнр орлцҗ, эрвлзҗ биилсинь кесг миңһн күн таасч хәләв. Нертә олн артистнрла хамдан байрин ик нәәрт орлцсндан ансамблин артистнр ик байрта бәәнә. Нарна эргциг дахсн болҗ зөв эргәд, цугтаг хамцулсн йовдлд орлцсан эдн кесгтән мартшго. Билг-эрдмин дөңгәр әмтн хамцдг седкл тиигәд эднә заң-авцд батрв.
Бурятин хәләһәчнр хальмг артистнриг тиигҗ халуч седклтәһәр тосч авснь үүлдврән цааранднь делгрүлхд ик урмд өгчәнә. Иим керг-үүлдврмүд сойлын залһлдаг батлсн деерән ах-дү келн-улсин кезәңк авъясмудыг хадһлҗ делгрүллһнд ик туста болҗана.

ҖИРҺЛИН Кермн