Депутатнрин үлгүрәр тооцаһан өгв

Давсн долан хонгт болсн Хальмг Таңһчин Улсин Хуралын (Парламентин) дарани сессьт Әрәсән Федерацин Хүүвин элч Байир Путеев 2024 җилд күцәсн көдлмшиннь тооцаһан өгв. Хальмг Таңһчин Толһач Хаска Батун седвәрәр таңһчин Улсин Хуралын депутатнр суңһачнрлаһан дару-дарунь харһад, ямаран төрмүд хаһлсна болн көдлмш күцәснә тускар тооцаһан өгнә. Тегәд Әрәсән Федерацин Хүүвд таңһчин зака үүдәгч бүрдәцин элч депутатнрин үлгүрәр бас тооцаһан өгхәр шиидв. Энүнә седвәриг депутатнр дөңнв.
Байир Путеевин темдглсәр, эн таңһчин зака үүдәгч болн күцәгч йосна бүрдәцслә бат залһлда бәрҗ, нег һазра улсиг үүмүлҗәдг болн соньмсулҗадг төрмүдиг хаһлхар шунҗ көдлҗәнә. Әрәсән Федерацин Хүүвд селәнә эдл-ахун, эрүл-менд харлһна, һазрин хәрлцәнә болн нань чигн төрмүдәр болсн селвлцәнд Байир Эдуардович шунмһаһар орлцҗ, орн-нутгин закадт сольвр оруллһна тускар зәңгллһ кев. Тер мет таңһчин зака үүдәгч бүрдәцин элч Федерацин Хүүвин медлд үүлддг комиссьмүдин, көдлмшч багмудын, комитетмүдин сүүрт орлцҗ, чинртә төрмүдәр болсн күүндврт, «төгрг ширән» сүүрт, селвлцәнд орлцсмн. Үлгүрнь, Әрәсән Федерацд ноос эд-бод келһнә болн терүг олзта-орутаһар хулдх таал тогталһна, зуульчллһ делгрүллһнә, регионмудт бичкдүдин садмудт болн сурһульмудт бат ясвр келһнә көтлвр күцәлһнә төрмүдт Байир Путеев онц оньг тусхав.
- Таңһчин зака үүдәгч бүрдәцин элч болдг төләдән Хальмг Таңһчин Толһачла, таңһчин Улсин Хуралын депутатнрла, таңһчин залврин гешүдлә, бәәрн залврин бүрдәцсин, олна ниицәсин элчнрлә бат залһлда бәрҗ үүлднәв. Цергә шишлң керг-үүлдврт орлцҗадг нег һазра улст дөң күрглһнә, эднә болн өрк-бүлмүдиннь зөв харслһна төрмүд эркн чинр зүүнә. «Төрскән харсачнр» шаңһа саңгин таңһчд үүлддг әңгин һардврла нөкцҗ үүлдҗ, орн-нутгин госпитальмудт эмнлһ авчадг цергчнрлә харһҗ, эднә төрмүдт орлцнав. Цергә шишлң керг-үүлдврт орлцҗадг нег һазра улст болн эднә өрк-бүлмүдин гешүдт социальн, эмнлһнә, юридическ, психологическ дөң күрглһнә төрмүд хаһлгдв. Нидн СВО-д орлцҗадг мана нег һазра цергчнрт, уснд авлгдсн Оренбургск мүҗин болн гер-бүүр уга үлдсн Курск мүҗин әмтнд, таңһчин эмнлһст дем күргҗ, буйнч седклин керг-үүлдврмүдт орлцсн биләв. Тер мет таңһчин бәәрн әмтнәс орҗ ирсн эрлһс хәләҗ, җирһлин күнд таалд туссн улст дөң-нөкд күрггдв, - гиҗ Байир Эдуардович келв.
Байир Путеев «Негдсн Әрәсә» партин Хальмг Таңһчд үүлддг региональн әңгин сегләтрин ахлачин I дарук, региональн политсоветин Президиумин гешүн болна, тегәд партин үүлдврт шунмһаһар орлцна. Партин төсвс таңһчд күцәмҗтәһәр күцәгдхин, олна дөңнлтин штаб секгдхин төлә Әрәсән Федерацин Хүүвин гешүн тәвцән орулна. Дорас өсч йовх баһчуд таңһчин олна-политическ бәәдл-җирһлд шунмһаһар орлцхин төлә эднлә дару-дарунь харһлтс бүрдәҗ, седвәртә, шунмһа күүкд-көвүдлә дамшлтарн хувалцна.
Таңһчин Улсин Хуралын депутатнр зака үүдәгч бүрдәцин элчин үүлдвриг үнлҗ, цааранднь чигн нөкцҗ хамдан чинртә төрмүд хаһлҗ көдлх болҗ үгцв. Депутатнрас үлгүр авч тооцаһан өгх седвәринь депутатнр буульҗ, таңһчин делгрлтд тәвцән орулҗ күцәмҗтәһәр көдлхиг дурдв.
ДООҖАН Наталья
Зургт: Байир Путеев «Воин» төвин гешүдлә