Элстин төв кеерүлгдҗәнә

Намртан болх шар шаҗна нарт-делкән ик хургт болн Элстин 160 җилин өөнд ик белдвр кегдҗәнә. Балһсна уульнцс болн хаалһс ясгдад, сән кец-таал тогтагдҗана. Шидр «Родина» сойлын төвин болн Манҗин Аркадин нертә филармоня өмн бәәдг талвңгудын ясвриг Элстин һардврин болн балһсна Хургин элчнр бүрткҗ хәләв.

Элст балһсна һардврин толһачин дарук Хаска Сергейин келсәр, эн хойр бәәрин ясврт нег өңгтә тосхлтын материал олзлгдҗана, тер юңгад гихлә хойр талвң нег кев-янзта болхмн. «Родина» сойлын төвин ясвр төгсхдән өөрдҗәнә.
– Манҗин Аркадин нертә филармоньд өргн көдлмш кегдҗәнә. Энүнә хойрдгч давхртнь хуучн тәәз ясгдҗана, тер мет киитрүлдг кергсл углҗ тәвгдв. Һазак талвңд болхла, ноха сарин чилгчәр Хальмгин Баатр Манҗин Аркадин бумблв тәвгдхмн. Энүнә түүрвәчнь Әрәсән улсин зурач, нертә скульптор Салават Щербаков болна, – гиҗ сойлын бүрдәцин һардач, ЭГС-ин депутат Очкан Анна зәңглв.

ОЛЬДАН Цаһан