Гевш Йонтен ачлгдв

Давсн долан хонгт хальмгудын нер дуудулсн ончта йовдл учрв. Олна үүлдврин халхд Хальмг Таңһчин элчнр седвәртәһәр үүлддгинь эн йовдл медүлв. Цуг Әрәсән кемҗәнд оюни күчиг батлҗ үүлддгән таңһчин элчнр дәкн нег үзүлв.
Әрәсән шар шаҗна сүзгтнрин оюни төв заллтын һардач гевш Йонтен «Страну меняют люди» гидг Келн-улсин түрүн мөрәһәр ачлгдв. Эн ик тоомсрта мөрә җил болһн Әрәсән Президент Владимир Путинә даалһврар бәрүлҗ өггднә. Әрәсән Президентин тоолврар, уралан көтлгч төсвснь болн социальн чинртә седвәрнь орн-нутгин делгрлтд ик тәвц орулҗадг иргнмүд тиим мөрәһәр ачлгддг мөн.
Гевш Йонтен төрскнч седклтә, гегән-герлин номин шунмһа тархаһач, шаҗна болн олна нертә үүлдәч болҗ нер һарч Хальмгт бәәтхә, таңһчин меҗә һатц олнд темдгтә болсмн. Әрәсән оюни күчиг икдүллһнә халхар күцәгдсн төсвнь сүл цагт олна оньгт бәәнә. Цергә шишлң керг-үүлдврт орлцҗадг цергчнрт болн теднә өрк-бүлмүдт килмҗ өгч дөң боллһнд зөрүлгдсн гевш Йонтена ик чинртә төсвиг әмтн таасад дөңнҗәнә. Төрскн һазрнь дән-даҗг уга бәәтхә, кен чигн эврә төрсн һазртан ни-негн бәәхин төлә әмән әрвллго дәәлдҗ йовх цергчнрт болн теднә үүлдвриг теткҗәдг цуг улст килмҗән күрглһн, оюни чидлинь батллһн өдгә цагт дәәнә нүүрт йовх әмтнд ик урмд өгчәнә. Шаҗн болһна хувргуд, тер тоод Бурхн Багшин Алтн сүмин болн Хальмгин цуг хурлмудын гелңгүд СВО-д орлцҗадг цергчнр даалһвран күцәҗ, әмд-менд иртхә гисн мөргүлмүд кеҗәнә. Цуг әмтн номин болн зальврлһна күчән цергчнрин эрүл-мендин төлә кегдҗәдг мөргүлмүдт орлцҗана. Дәәлдәнә һазрт күрч, шаҗна хувргуд тенд мөргүлмүд кеҗ, цергчнрлә харһҗ күүндәд, гертәснь зәңг авч ирнә.
Ода өөдәнәр үнлгдҗәдг төсвсиг Хальмг Таңһчин Олна Палат дөңнсн билә. Таңһчин иргнмүд болн олна йосна халхин цуг бүрдәцс таңһчин болн орн-нутгин делгрлтин төлә чидлән хамцулҗ үүлдҗәхинь эннь медүлҗәнә.
«Мана һазра көвүдт ханлтан медүлҗәнәв. Иим төсвс мана Әрәсәг ниицүлҗ хамцулҗана. Бурхн-шаҗндан иткәд, төрскн һазртан цань уга итклтә болҗадг үлгүр мөн!» – гиҗ үнн седкләсн Хальмг Таңһчин Толһач Хаска Бату йөрәлин үгдән темдглв.

ҖИРҺЛИН Кермн