Бурхн Багш номан хәәрлсн өдр

Бурхн Багшин номд шүтдг таңһчин әмтнд така сарин 28 өдр ончта өдр болҗана. Оюни герл заясн Бурхн Багшин үүлдврлә залһлдата һол нег байр эн өдр темдглгднә. 2500 җил хооран Гегәрлтин хаалһд орад, Бурхн Багш түрүн болҗ номан хәәрлсн өдр болҗана.
Җил болһн Хальмгт эн өдриг темдглнә. Бурхн Багшин Алтн сүмд байрин керг-үүлдврмүд күцәгднә. «Номин Күрдин Дүүцң» гиҗ тернь нерәдгднә.
Эн өдр хурлд өрүн эрт ирәд, 5-н часла нег хонга цер авч болхмн. Гевш Чангчуб тиим седклтәһәр ирсн әмтнд ном умшҗ, Махаянан самнр авхднь һарвр өгхмн.
Өрүн 8-н часла авъяс болсн шаҗна сәәхн йосрхл күцәгдхмн. «Мәәдрин эргцд» орлцад, хурлын гелңгүд болн ирсн әмтн Мәәдр гегәнә көшә өргҗ авад, Кангьюр номиг һартан бәрәд, хурлыг зөв эргҗ йовхмн. Номин эргцд зогслт угаг медүлҗәх евәлтә эн үүлдврт олн улс орлцна.
Дигтә 9-н часла байрин ик мөргүл эклхмн. Асхн 18-н часла гевш лхарамб Джагба Гьяцо Бурхн Багшин номин цәәлһвр өгхмн.
Бурхн Багш түрүн болҗ номан хәәрлсн өдриг хурлд ирҗ темдгләд, мөргүлд орад, номин цәәлһвр соңсад, таңһчиннь делгрлтин төлә, цуг әмтнә амулң мендин төлә, дән уга эвин бәәдлин төлә зальврх таал учрҗана.
УШКАНА Сувсн