Бачм дөң күрглһиг ясрулхар

П.Жемчуевин нертә таңһчин эмнлһнә эмчнр Улана Ульяна болн Инчан Ноһан эн өдрмүдт Санкт-Петербург балһснд бәәнә. Эдн И.Павловин нертә негдгч медицинск ик сурһульд түргн дөң күрглһнә туст дамшлт хоршаҗана. «Бачм дөң күрглһиг ясруллһн» гидг орн-нутгин төсвин йовудт таңһчин эмнлһнд гемтә улсиг орулҗ авлһна әңг тосхгдхмн.

Әрәсәд ода деерән зуг цөөкн тиим әңг үүлдҗәнә. 2030 җил күртл бачм дөң күрглһнә 99 модульн әңг тосхгдхмн гиҗ зуралгдҗана. Тер тоод мана таңһчд П.Жемчуевин нертә таңһчин эмнлһнә улд тиим әңг бас секгдхмн.
- Бидн гемтә улсиг һурвн әңгд орулҗ авлһна, теднә иткл цаасд белдлһнә диг-дара хәләҗ, бачм дөң күрглһнә әңгин үүлдврлә таньлдвидн. Мана эмнлһнд бас ноһан, шар болн улан әңг бәәнә, болв бачм дөң күрглһнә әңгин үүлдвр невчк талданар бүрдәгднә. Дәкәд тиим әңгд реанимационн орм болн шишлң палатмуд бәәнә, тенд реаниматологуд көдлнә, - гиҗ таңһчин эмнлһнә ах эмчин дарук Улана Ульяна келв.
Эн зунын эклцәр таңһчин эмнлһнә ах эмч Чумпинә Саглр Санкт-Петербургск негдгч медицинск ик сурһульд бас одсн билә. Ик сурһулин һардач Сергей Багненкола болсн харһлтд таңһчин эмнлһнд шин әңг секлһнә төр хәләгдсн билә. Ик сурһуль П.Жемчуевин нертә эмнлһнә үүлдвриг залҗ олн зүсн төрмүдәр дөң күргнә, тегәд хальмг эмчнр Санкт-Петербург балһснд одҗ дамшлт хоршадг болхмн. Ик сурһулин элчнр ноха сард мана таңһчур ирхәр зуралҗана.
БАТАН Наталья
ЗУРГТ: П.Жемчуевин нертә таңһчин эмнлһнә эмчнр Санкт-Петербургск негдгч медицинск ик сурһульд одсн кем