Цугәрәсән марһанд орлцхар белдҗәнә

Баһ Буурл селәнә дунд сурһулин хальмг келнә билгтә багш Хулхачин Басң Бурятин Улан Удэ балһснд һаха сард болх Цугәрәсән марһанд орлцхмн.

Төрскн келнә багш Хулхачин Басңгин нерн олн багшнр дунд темдгтә. Яһад гихлә Басң Сергеевич хальмг келнә болн утх-зокъялын багшнрин таңһчин 2025 җилин марһанд диилвр бәрв. Түрүләд Ик Буурла района багшнр дунд болсн марһанд түрүн орм эзлсмн. «Тиим района марһан одахнас авн бүрдәгддг болв, урднь болхла сән багшиг шүүҗ авад таңһчии марһанд йовулдг билә. Ода талдан кичәлмүдин багшнр мет бидн муниципальн девсңд бас орлцҗ хоорндан дөрлднәвидн. Тиим үүлдвр маднд урмд өгчәлә, таңһчин марһанд сәәнәр белдхин төлә дөң болна, марһана зокалын тускар бидн улм тодрхаһар медҗ авнавидн, района багшнр чигн тиим кевәр хоорндан улм өөрхнәр таньлдна», – гиҗ Басң Сергеевич тоолвран келнә.
Таңһчин марһанд төрскн келнә йилһән сән, ик дамшлтта багшнр Басң Сергеевичлә дөрлдҗәлә, тегәд эдн дундас йилһрҗ диилвр бәрх гиҗ Ик Буурла района элч нам санҗасн уга. Болв цуг арһ-чидлән агсад, чадмган үзүләд, нүүрт һархар зүткҗәлә, марһана йовудт орсна хөөн чигн ик омг авла. Ик Буурла әәмгин сурһулин заллтын болн Баһ Буурл селәнә сурһулин багшнр чигн Хулхачин Басңгиг йир сәәнәр дөңнҗ, марһана йовудт селвгән өгч урмд өгчәлә, олн җилин дамшлтнь, хоршасн ховр эв-довнь Басң Сергеевичд бас дөң болҗаснь лавта.
Марһанд хамгин дааврта хальмг келнә кичәл бәәсмн. Ахр болзгт балһсна сурһульчнриг кичәлин төрлә таньлдулҗ, шин үгмүд дасхҗ шин эв-арһ яһҗ олзлдган багш үзүлх зөвтә бәәсмн. Тер неквриг Баһ Буурла багш сәәнәр күцәв. Кичәлин чилгчәр 9-ч классин цуг сурһульчнр шин үгмүд дасч авад, тедниг чикәр олзлҗала, күүндврт чигн орлцҗала, тиим кевәр Басң Сергеевич марһана нүүрлгч багд орв. «Болв мини Баһ Буурла сурһульчнр хальмг келән балһсна күүкдәс сәәнәр меднә, яһад гихлә мана классмудт сурһульчнр чигн цөөкн, тегәд тедниг сәәнәр дамшулх арһ бәәнә, тиим кевәр кичәлин йовудт бидн кесг тоотыг дасч авнавидн», – гиҗ Хулхачин Басң келнә.
Тер мет цуг сурһулин керг-үүлдврт, тер тоод Цаһана болн Зулын байрт, нань чигн керг-үүлдврмүдт энүнә сурһульчнр хальмг келнә сән медрлән үзүлҗ, шүлгүдән, йөрәлән келҗ, хальмг ду дуулҗ олна нәәрт шунмһаһар орлцна. Хальмг кел өргҗүлхин төлә бичкдүдт кичәлин йовудт бат медрл өгх кергтә, гиҗ Басң Сергеевич келнә. Эк-эцкнрнь чигн эдниг дөңнҗ өрк-бүлдән хальмгар келхлә ик туста болх билә, болв тернь ода ховр юмнд хүврв гиҗ заана. Тегәд чигн Басң Сергеевич эк-эцкнриг чигн сурһулин болн классин керг-үүлдврт орлцулна, тиигҗ хамцу күчәр, багшин дөңгәр чигн сурһульчнр болн теднә эк-эцкнр медрлән гүүдүлнә.
Тер мет кичәлд Басң Сергеевичин олзлдг өдгә цагин эв-арһс хальмг келнә медрл гүүдүллһнд сән нилчән күргнә. Тиигҗ эврәннь олн улсин, туурмҗта өвкнрин тууҗан, авъясан, чилшго уурхан саңта төрскн келән дасх сурһульчнрин санаһинь чаңһаҗ урмдулна. Тегәд чигн района олимпиадмудт Баһ Буурла сурһульчнр призермудын болн дииләчнрин тоод орна. Тиим билгтә арвтнрин тоод 6-ч классин сурһульч Баднян Станислав, сурһулян төгсәсн Лизинә Ангелина болн нань чигн күүкд йовна.
Ода Басң Сергеевич Улан Удэ балһснд болх төрскн келнә багшнрин Цугәрәсән марһанд белдҗәнә, тернь һаха сарин 7-с авн 14 күртл болхмн. Талдан багшнр зуни цагин амрлһнд һарч сул цаган гертән, өрк-бүлдән, хаша-хаацдан давулдг болхла эс гиҗ теңгсин көвәд одад, цевр аһар киилдг болҗахла, Басң Сергеевич белдврән уурулҗахш, тер кергт энүнд Баһ Буурла сурһулин һардач, англь келнә багш Петушан Байрта дөң болҗана, района талдан чигн сурһульмудын багшнр Хулхачин Басңд күцәмҗ дурдҗана, бидн чигн тер йөрәлд багтҗ сән аш бәрҗ алтн җолаһан эргүлҗ иртхә гиҗ дурдҗанавидн.

ТҮРВӘН Һуна