«Буддист» дуудврта командир

Цергә шишлң керг-үүлдврин йовудт нег һазра мана дәәчнр Төрскән зөргтәһәр харсч йовна. Шидр «Буддист» дуудврта командирин тускар шаңһа телеүзләр зәңглсн билә.

Курск мүҗд өшәтн орҗ ирхлә тер дарунь гилтә «Буддист» эврә дурар, Төрскән харсгч Алдр дәәнд орлцачин, элнцг аавиннь үлгүрәр тиигәрән одхар шиидв.
Энүнә һардврт бәәсн цергчнр хамгин әәмшгтә кесг дәәлдәнд орлцв. Курахово балһсна болн Романовка селәнә өөр болсн догшн дәәлдәнд залу-зөргән эдн үзүлв. Күндәр шавтсн «Буддист» хооран цухрсн уга, госпитальд эмнлһ авад, дарунь үүрмүд талан хәрү ирв. Эклсн кергән эрк биш төгсәх кергтә, гиҗ эн келв.
– Өдгә цагт «Буддист» түрүн зергләнд йовҗ, баахн дәәчнриг дасхҗ, дамшлтарн хувалцҗана. Нег һазра мана дәәчнр диилвр делдҗ, әмд-менд гертән ирхинь цуһар зальврҗ күләҗәнәвидн, – гиҗ Бату Сергеевич товчлв.
ОЛЬДАН Цаһан