Путевкар ачлгдв

Шидр Элстин ончрсн 43 сурһульч Сочи балһснд амрад ирв. Эн йовлһиг Элст балһсна һардврин толһач Лиҗикә Алдр бүрдәсн болдг.

Дөчн һурвн сурһульчин дунд Цугәрәсән олимпиадмудын призермуд, билг-эрдмин марһасин лауреатнр, ЮФО-н, Әрәсән болн Европин олн зүсн спортын марһасин дииләчнр йовв. Тер мет Элстин сурһульмудын дунд давулгдсн КВН-на дииләч «Трешка» нертә багд орлцачнр бас тиигәрән одв.
– Хамгин түрүнд мана сурһулин һардврт, тер мет Элст балһсна һардврин Толһач Лиҗикә Алдрт мадниг путевкар ачлсинь ханлтан өргҗәнәв. Сочи балһснд күрәд, Хар теңгст амрад, цогц-махмудан батрулад ирвидн, – гиҗ «Трешка» багд орлцач Көкән Анастасия келв.
Тер мет сурһульчнрин эк-эцкнр Элстин һардврт бас ханлтан өргҗ, эднә көвүд-күүкд сәәнәр амрч, сурһулин шин җилин өмн эрүл-менд бәәдлән ясрулҗ, хоорндан өөрхн таньлдҗ ирв, гиҗ темдглв.
Зуни амрлһна цагт тиим йовлһн сән авъяст тохрхмн, гиҗ Элстин һардвр зәңглв.

БАДМИН Занда