Бурхн Багш түрүн номан хәәрлсн өдр

Бурхн Багшин номд шүтдг таңһчин әмтнд така сарин 28 өдр ончта болв. Оюни герл заясн Бурхн Багшин үүлдврлә залһлдата һол нег байр эн өдр темдглгднә. 2500 җил хооран Гегәрлтин хаалһд орад, Бурхн Багш түрүн болҗ номан хәәрлсн өдр болҗана.

Җил болһн Хальмгт эн өдриг темдглнә. Бурхн Багшин Алтн сүмд байрин керг-үүлдврмүд күцәгднә. «Номин Күрдин Дүүцң» гиҗ тернь нерәдгднә.
Эн өдр хурлд өрүн 5 часла ирәд, нег хонга цер авч болна. Гевш Чангчуб тиим седклтәһәр ирсн әмтнд ном умшҗ, Махаянан самнр авхднь һарвр өгсмн.
Өрүн 8 часла авъяс болсн шаҗна сәәхн йосрхл күцәгдв. «Мәәдрин эргцд» орлцад, хурлын гелңгүд болн ирсн әмтн Мәәдр гегәнә көшә өргҗ авад, Кангьюр номиг һартан бәрәд, хурлыг зөв эргҗ йовв. Номин эргцд зогслт угаг медүлҗәдг евәлтә эн үүлдврт олн улс орлцв.
Дигтә 9 часла байрин ик мөргүл эклв. Асхн 18 часла гевш лхарамб Джагба Гьяцо Бурхн Багшин номин цәәлһвр өгв.
Бурхн Багш түрүн болҗ номан хәәрлсн өдриг хурлд ирҗ темдгләд, мөргүлд орад, номин цәәлһвр соңсад, таңһчиннь делгрлтин төлә, цуг әмтнә амулң-мендин төлә, дән уга эвин бәәдлин төлә зальврх таал учрв.

УШКАНА Сувсн