Шаңһа көтлвр селәдин делгрлтд туслҗана

Одахн Хальмг Таңһчин залврин сүүрт селәдин делгрлтин шаңһа көтлврин аш диглгдҗ, 2020 җиләс авн терүнә йовудт ямаран төрмүд хаһлгдсна, ямаран керг-үүлдврмүд күцәгдснә тускар өргн күүндвр болв. Хальмг Таңһчин селәнә эдл-ахун министр Гаван Тимур хәләгдсн төрәр тооцаһан өгч, эн җил көтлврин йовудт кех-күцәх көдлмшин тускар хувалцв. Мана таңһчд бәәдг улсин 53 хүвнь селән һазрт әмдрҗәнә, тегәд эн шаңһа көтлвр эркн чинр зүүҗ, селәнәхнә җирһлин кец-таал ясруллһнд туслна гиҗ сүүрт келгдв.

Дааврта һардачин келсәр, 2020-2024 җилмүдин эргцд мана таңһчин селәдин делгрлтд шаңһа хазнас 1,3 җува арслң йилһгдсмн. Тер мөңгәр 80 селәнд сән кец-таал тогталһна 92 төсв күцәгдв, 15 бүрдәцд ясвр кегдв эс гиҗ ишнәр тосхгдв. Тер мет 95,23 дууна усна сурвлҗн, 5 дууна һазрт уульнцст шам углҗ тәвгдв, 32,6 дууна хату девскртә хаалһ тосхгдв. Эн җилмүдин эргцд селәдин паркст, социальн бүрдәцсин эргнд сән кец-таал тогтагдв, бичкдүдин төлә нааддг болн спортивн талвңгуд секгдв, әмтн йовһар йовдг хаалһс тосхгдв. Көтчнрт сойлын Гер тосхгдв, Комсомольский селәнд сойлын герт ясвр кегдв. Шаңһа көтлврин йовудт селән һазрт бәәдг 54 өрк-бүлин гер-бүүрин таал ясруллһнд 95,6 сай арслң һарһгдв.
Эн җил мана таңһчд селәдин делгрлтин көтлврин керг-үүлдврмүд күцәлһнд ут тоодан 568 сай арслң йилһгдв, терүнәснь орн-нутгин хазнас 379,4 сай арслң болна. Таңһчин хазнас 23,7 сай болн бәәрн хазнас 115 сай һар арслң эн керг-үүлдврмүдт олзлгдхмн. Эн җил Көтчнрә, Октябрьск болн Үстин райодт дөрвн хаалһин ясвр кегдҗәнә, ут тоодан 14 дууна хаалһ сән чинртә болхмн. Селәдт сән кец-таал тогталһна көдлмш цааранднь күцәмҗтәһәр күцәгдҗәхиг министр заав. Тиигәд, Яшкулин района Яшкуль селәнд уульнцст шам углҗ тәвв, Хулхт селәнд болхла спортивн талвң тосхв, бәәрн баһчуд тенд цогц-махмудан батрулҗ, чик авг-бәрцәр бәәҗ цаган тустаһар давулҗана. Көтчнр болн Баһ Дөрвд селәдт әмтн йовһар йовдг хаалһс тосхгдв. Октябрьск район селәдин делгрлтин шаңһа көтлврт эн җил шунмһаһар орлцҗахнь темдгтә. Энд тавн төсв күцәгдҗәнә. Тиигәд, Ик Царң селәнд спортивн бәәрн тосхлһнд 89 сай арслң йилһгдв. Тер мет энд олн халхин спортивн-наадын талвң тосхгдҗана. Района төв селәнд Чекистнрин уульнцд хаалһин бат ясвр кегдҗәнә, 11 уульнцд шам болн Диилврин паркд сән чинртә залһлдаһар тетклһнә кергсл углҗ тәвгдв.
Хальмг Таңһчин залврин Ахлач Босхмҗин Гилән болн Хальмг Таңһчин Улсин Хуралын (Парламентин) Ахлач Артем Михайлов хәләгдсн төрәр ухан-тоолврарн хувалцҗ, селән һазрт бәәдг улсин җирһлин таал ясруллһна, социальн бүрдәцст ясвр келһнә, хаалһс тосхлһна шаңһа көтлврт шунмһаһар орлцх кергтә гиҗ райодын толһачнрт дуудвр кев. Ода деерән зуг 6 района муниципальн бүрдәц селәнә делгрлтин көтлврт орлцҗ, эврәннь төсвс күцәҗәнә, тегәд теднәс үлгүр авч көдлмшән шунмһадулх неквр тәвгдв. Зуг Целинн района толһач Опин Эрднин келсәр, эдн хотл балһснас хол биш бәәдг учрар эн шаңһа көтлврт орлцх зөв уга болна. Әрәсән селәнә эдл - ахун Министерствин медлд бәәдг шаңһа көтлврин некврәс иштә балһснас 30 дуунад бәәдг селәд терүнд орлцҗ чадхш, тегәд талдан төсвст орлцхд дөң күргхиг района толһач сурв.
Таңһчин селәнә эдл-ахун министр Гаван Тимурин темдглсәр, мана таңһч селәдин делгрлтин шаңһа көтлврт күцәмҗтәһәр орлцҗ, кесг төсв күцәв. Шаңһа дөңгәр хаалһс ясгдҗахнь, социальн бүрдәцс, спортивн болн бичкдүд нааддг тавлңгуд тосхгдҗахнь, паркст сән кец-таал тогтагдҗахнь селән һазрт бәәдг улст ик урмд өгч, төрскн һазртан бәәһәд көдлхд туслна.
ДООҖАН Наталья
ЗУРГТ: Октябрьск района Ик Царң селәнә бичкдүдин талвң