Әмтнд цергллһнә үлгүр

Хальмгин тууҗд эн зунар ончта олн йовдл учрад бәәнә. Тиим нег йовдл одахн болв. «Доброволец России» гидг ачлврар Заяна Абдулова темдглгдв. Эндрк өдрин нүүрт йовх эн күүкиг Хальмг Таңһчин Толһач Хаска Бату үнн седкләсн йөрәв.

Седвәртә эн күүкн Элстин «Добро.Төвин» һардачар үүлднә. Шидр болсн хург деер өөдән ачлвриг мана һазра күүкнд Әрәсән залврин ахлачин дарук Дмитрий Чернышенко бәрүлҗ өгв.
Өөдән эн ачвр нидн Әрәсән залвр батлҗ, кен терүгәр ачлгдхинь диглсн болдг. «Доброволец России» ик тоомсрта эн ачлвр җилд нег дәкҗ бәрүлҗ өггднә. Әмтнд цаһан седкләсн дөң күрглһн җирһлин керг болсн улст эн ачлвр бәрүлҗ өггднә.
Эн җил түрүн болҗ өөдән ачлвр йисн күүнд бәрүлҗ өггдв. Тедн дунд Хальмг Таңһчас Элстин Добро.Төвин һардач Заяна Абдулова заагдв. Әмтнд үнн седкләсн дөң болҗадг Заяна Абдуловаг таңһчин волонтермуд сәәнәр меднә. Баһчудт дөң боллһна «Сар герл» олна бүрдәцин гешүн болҗ үүлднә. Өрк-бүлдән даҗрлһнла харһсн экнрт болн үрдт дөң болдг «Дом Надежды» гидг бүрдәцин үүлдврт орлцх цаг Заяна олна. Һурвн үртә эк болҗадг эн күүкд күн күнд бәәдлд туссн, зовлңла харһсн улст дөң болхар даңгин адһна.
2020 җиләс авн шамдһа эн күүкд күн #МЫВМЕСТЕ гидг нертәһәр кегдсн кен-негндән дөң боллһна Цугәрәсән керг-үүлдврт шунмһа кевәр орлцсмн. Әмтнд тусан күргх седкл энүнә заң-авцд йириндән батрсмн. «Войны Света» гидг нертәһәр баһ наста арвтнрт дөң күргдг таңһчин төв секгдсн үүлдҗәнә. Ямаран буйнта керг!
Элстин «Добро.Төвд» кеҗәдг энүнә көдлмш чигн олнд туста үүлдвр болҗана. Энүнә һардврт гуманитарн дөң цуглулгдҗ, Белгородын әмтнд, тенд цергә шишлң керг-үүлдврт орлцҗадг дәәчнрт йовулгдна. Үнн седклин шунмһа үүлдврин ашт Элстин Добро.Төв мана регионд түрүн нүүрт һарад, цуг Әрәсәд сән дурар үүлддг эн җисәнә зун тәвн сән гисн бүрдәцсин тоод орв.
Хальмгт җил ирвәс сән дурар үүлддг эн җисән ик делгрлт авад, өр-өвч седклтә олн улсиг тер тоод баһчудыг хамцулҗахнь байрта йовдл мөн. Ода эн җисәнә зергләнд 11 миңһнәс даву күн орлцҗана. Эдн кен чигн чик седклтә, олнд тусан күргҗ йовх улс болҗана. Эдн маднд төрскн һазрин нериг тууруллһна үлгүр болҗана.
ҖИРҺЛИН Кермн