Поштын көдләчин көдлмш дааврта болдмн

Урднь мана орн-нутгт өрк-бүл болһн олн зүсн барин һарц бичүлҗ авдг бәәсмн. Дәкәд әмтн нег-негндән бичг бичдг билә. Мана җирһл нег ормдан зогсхш, өдгә цага эв-арһс өргнәр олзлгддг болад әмтн сүл зәңгиг ниигмин сүлҗәнд медҗ авна, таньл-үзл үүрмүдтән болн элгн-садндан дару-дарунь җиңнүләд теднә бәәдл-җирһлин тускар цугинь меднә. Болв тер бийнь поштын туслмҗ угаһар бидн бәәҗ чадхшвидн.

Аңһра Стелла Үстин района Харба селәнә поштд 2009 җиләс авн көдлҗәнә. Стелла Саранговнан келсәр, эн әмтнд газет болн бичгүд гертнь күргҗ өгнә, медәтнрт пенсин мөңгинь өгнә. Әмтн нааран ирҗ илгәвр йовулна эс гиҗ ирҗ авна. Дәкәд бәәрн әмтн сар болһн поштд ирҗ коммунальн туслмҗин мөңгән өгнә. Сүл җилмүдт поштын әңгүдт олн зүсн эд-тавр болн хот-хол хулддг болв. Поштын әңгд олн зүсн лотерейин билетмүд бас хулдгдна, тегәд зәрм әмтн терүг хулдҗ авна.
Күүкд күн бийнь эн селәнд өсәд-босад, хәрд һарад өрк-бүлтәһән энд бәәнә. Эрдмәрн эн эрүл-менд харлһна көдләч болна, бәәрн эмнлһнд олн җилдән көдлсмн. Урднь эн поштын әңгиг һардҗасн Зинаида Батыровна Куртушова энүнд хамдан көдлх үрвр кесмн. Ачта амрлһнд һархларн Стелла Саранговнаг бийиннь ормд үлдәсмн, тегәд эн сүл арвн җилдән эн әңгиг һардҗана. Көдлмш түрүн хәләцәс амр гиҗ медгднә, болв кех-күцәх керг баһ биш болна. Ода селәнд 60 һар күн пенсь авна, тегәд күн болһнд мөңгинь цаглань болн чикәр өгх кергтә. Поштын әңгд хулдгдҗадг эд-тавриг болн хот-хоолыг бас хулдад, мөңг олх кергтә. Тегәд поштын көдләчин көдлмш ик дааврта болдгнь маһд уга.
Стелла Саранговна өнр-өсклң өрк-бүлд һарсмн. Эк-эцкнь Сарң Убушаевич болн Лариса Владимировна Тюрбеевихн хамдан җирн һар җилдән хамдан бәәнә, эдн 6 үрндән чик сурһмҗ өгсмн. Эцкнь олн җилдән төрскн селәндән җолачар болн комбайнерар көдлҗ йовсмн, экнь дунд сурһульд багшлҗ йовла. Эндр эдн 18 ач-зееһиннь болн 18 җич-зеенчнриннь кишгт багтҗ, нүдн-амн болҗ бәәнә. Эк-эцкиннь үлгүрәр Стелла Саранговна бас бат болн өнр-өсклң өрк-бүлтә болв. Эрик Бембеевич авальтаһан һучн дөрвн җилдән ниитә бәәҗ, дөрвн үртә болв. Ирина күүкнь МЧС-ин майор, Артем эврә эдл-аху бәрҗ малын хошт көдлҗәнә, Нарн цергә хаалһ шүүҗ авв, эн капитана цолта, цергә шишлң керг-үүлдврт түрүн өдрәс авн даалһвран күцәҗ йовна, отхн Артур Хальмг ик сурһульд сурчана, иргчдән малын эмчин эрдмтә болхмн. Күүкднь бичкнәсн авн спортар соньмсҗ, чик авг-бәрцәр бәәнә. Харба селәнд өсәд-боссн Четрә Окан санлд нерәдгдсн гиигн атлетикин марһанд эдн цуһар орлцдг бәәсмн.
- Селән бичкн болв чигн поштын әңг үүлдх зөвтә. Бәәрн әмтн нааран ирҗ ямр нег бичг, илгәвр авна. Медәтнр болхла пенсән авсн деерән, хоорндан күүндҗ, зәңгәрн хувалцна. Сар болһн коммунальн туслмҗин мөңгән өгч, олн зүсн эд-тавр хулдҗ авна. Урдк цагла әдл әмтн олн барин һарц авхш, болв тер бийнь района болн таңһчин газет-седкүл бичүлнә. Эрүл-менд харлһна халхд көдләд амрлһнд һарсна хөөн энд көдлдг болад, поштын әңгин үүлдвриг диг-дараг медҗ, шин эв-арһс дасч авв. Көдлмш нанд таасгдна, әмтнд туста болсндан байрлнав, – гиҗ Стелла Саранговна келнә.

ДООҖАН Наталья
ЗУРГТ: Үстин района Харба селәнә поштын әңгин һардач Аңһра Стелла көдлмштән