Чадмг һардач Цекирә Евгений

1990 җилмүдәс авн тосхлтын халх мана таңһчд көдлмшин кемҗәһән баһрулад йовла. Советин йосна җилмүдт бәәсн ДСК болн тосхлтын трест, кесг нань чигн бүрдәцс болн ПМК-с райодар болн Элстд көдлдгән уурла, гермүд тосхлһн холванд баһрла. Зуг 2000-ч җилмүдт экономикин улынь тогтаҗадг халх невчк әмдрв, Элстд 9-ч микрорайонд гермүд тосхгддг болв, дәкәд нурад унҗадг гермүдәс әмтиг нүүлһлһн эклсн кемд көдлмшин кемҗән немгдв.

Ода әмтиг нүүлһдг җисәнлә дегц йирин тосхлт йовуд авчана, бүрдәцсин, эмнлһнә, сурһульмудын гермүд тосхгдҗана, яһад гихлә экономикиг босхлһна һоллгч ул-сүүрнь тосхлт болҗана. Тер җисән эклсн кемлә тосхлтын халхин ветеран Цекирә Евгений «Стройинвест» бүрдәциг тогтала, эдн тосхлтын көдлмш келһнә әмтнәс болн талдан бүрдәцсәс даалһвр авчала, тосхачнриг шин бәәрнс тосхлһнд орулҗ бичҗәлә, талдан чигн бүрдәмҗин көдлмш күцәҗәлә.
Тиим кевәр экономикин шин таалд Евгений Александрович эврә кергән бүрдәв, көдлмш немгдәд бәәхлә 2008 җилд онц эзнә эврә «Жилпромстрой» гидг нертә салг-үүлдвр тогтав. Түүнә ханьд «Стройинвест» бүрдәц бас орла. –Мана салг-үүлдвр әмтн бәәдг гермүд тосхна, сурһульмудын, бичкдүдин садмудын, талдан чигн бүрдәцсин бат ясвр кенә. Тосхач болҗ 40 һар җилдән көдлҗәнәв. Нанд тер эрдм баһ настадм таасгдҗала. Әәрмәс бууҗ ирәд, Сарпан района Аршан-Зелмн селәнә тосхлтын әңгд көдлҗәләв, тиигҗ тосхачин эрдмлә иҗлдләв, – гиҗ Евгений Александрович эврә түрүн дамшлтан яһҗ хоршасна тускар келҗ өгв.
Дәкәд 1982 җилд Подольск балһснд политехникум чиләһәд, «техник-тосхач» гидг эрдм дасч авла. Цааранднь Элстин тосхлтын халхин салг-үүлдврт көдлҗәһәд, улм ик дамшлт хоршаҗ сән мергҗлт болв, Элстин болн райодын кесг бәәрнсиг эдлврт орулла. Болв советин йосн уурулгдсна хөөн эврә компань тогтах, эврә бизнесән үүдәх цаг ирв. Экономикин болн бухгалтерин кесг тоотыг медҗ авх кергтә бәәсмн.
Тегәд Евгений Александрович Пятигорск балһсна технологин күрәлңд сурһуль сурла, энд бухучетын эрдм дасч авла, тернь шин көдлмшт икәр керглгдәд бәәв, яһад гихлә тосхлтын салг-үүлдвриг һардхин төлә шин кесг тоот медх кергтә бәәсмн. Тиигәд шин эрдмнь һардачин кергиг дигтә-тагтаһар күцәхин төлә ик дөңгән күргв. Түүнә итклтә үүрмүдин тоод Шурһчин Нарн болн талдан ветеранмуд йовна, хамдан эдн кесг җилин туршарт көдлҗәнә.
Ода «Жилпромстрой» салг-үүлдврт 45 күн көдлҗәнә, эдн тосхлтын цуг көдлмшиг күцәнә. Дамшлтта тосхачнр Элстин 20-ч тойгта сурһульд бат ясврин көдлмш күцәҗәлә. Ода хотл балһсна 5-ч болн 24-ч тойгта бичкдүдин садмудт көдлҗәнә. Ноха сард эдн хойр бәәриг эдлврт орулх зөвтә. «Баһчуд болн бичкдүд» гидг Әрәсән келн-улсин төсвин кемҗәнд эн көдлмш күцәгдҗәнә.
Тосхачнрин болн садын көдләчнрин келсәр, эндр тосхлтын көдлмш цаг болзгла ирлцәтәһәр күцәгдҗәнә. Дулана болн усна сурвлҗиг эдвлрт оруллһна көдлмш дуусгдсн бәәнә. Ода тосхачнр полд девскр бүркҗәнә, хот-хоолын болн эмнлһнә хораст плитк тәвҗәнә, садын гермүдин ораг болн һазак эрсмүдиг шинрүлҗәнә.
Тер мет шин мебель, кергсл-киитрүләчнр, электробешмүд болн нань чигн өдгә цагин тоот энд орулҗ тәвгдх. Тиим кевәр бичкдүдин болн садын көдләчнрин сән таалта җирһлин болн көдлмшин төлә цугнь кегдх. «Мана көдләчнр цуг көдлмшиг сән чинртәһәр күцәхәр шунна, тегәд эн хойр бәәрн цаглань эдлврт орулгдад, кергтә цуг көдлмш энд күцәгдх, тиим кевәр мана дамшлтта тосхачнр теднд өгсн даалһвриг седклән тәвәд күцәҗәнә», – гиҗ салг-үүлдврин һардач Цекирә Евгений келнә. Цугинь эн эврән бүрткнә, кергтә заавр өгнә, тиим кевәр ода күцәҗәх чинвртә көдлмшнь цуг цагинь эзлнә.
Элстин болн райодын бәәрнст талдан региона тосхачнр көдлсн деерән мана бәәрн тосхачнр чигн көдлмшән сән чинртәһәр күцәҗ, дааврта хәләцән медүлнә. Тер тоод тосхлтын ветеран Цекирә Евгений һардҗадг салг-үүлдвр бас йовна.
ТҮРВӘН Һуна
Зургт: Цекирә Евгений күүктәһән