Тосхачин алтн һарар гермүд босхгдна

Делкә, мана бәәдл-җирһл ямр кевәр сольгдв чигн тосхачин эрдмтә улс кезә чигн кергтә болна. Маңһдур мана орн-нутгин тосхачнр сән Өдрән темдглхмн. Кезәнәс авн тосхлтын халх улсин эдл-ахун хамгин чинртә халхсин негнь болдг. Ке-сәәхн шин гермүд, сурһульмуд, бичкдүдин садмуд, талдан чигн бүрдәцс өдр ирвәс балһсн болһнд тосхгдад олн-әмтнә төлә сән таал тогтана.

Тосхач гидгнь күнд болн ик дааврта эрдм мөн. Эднә күчәр җил болһн балһсд өсәд-өргҗәд йовна. Арвн һурвн җилдән киитн Сиврт бәәсн мана аавнр-ээҗнр тәвдгч җилмүдин чилгчәр төрскн теегтән хәрҗ ирәд, таңһчан шинәс босхв. Өдгә цагт болхла тосхачнр ахр цагин болзгт олн давхрта гермүд босхад, кесг миңһәд дөрвлҗн метр эдлврт орулгдҗана. Тер мет һаха сард Элст балһснд болх шар шаҗна нарт-делкән чуулһнд ик белдвр кегдҗәнә. Нег үлү тосхачнрин арһ-чидләр балһсна төв уульнцсин болн чинртә бәәрнсин ясвр күцәгдҗәнә. Терүнәс нань 2022 җиләс авн шаңһа төсв күцәлһнә йовудт Хальмг Таңһчд 47 дунд сурһульд бат ясвр кегдв. Эн җилд болхла таңһчин арвн сурһульд болн бичкдүдин хойр садт ясврин көдлмш давулгдҗана. Эрүл-менд харлһна халхар таңһчин селәдт ОВОП-муд, ФАП-муд тосхгдҗана. АПК-н халхар болхла хальмг тохма мал өскхин төлә бордлһна кесг талвңгуд тосхгдв. Өдгә цагт Элстд дәәнә ветеранмудын төлә шишлң госпиталь бас тосхгдҗана. Дәкәд немхд, таңһчин селәдт бәәрн улсин мөңг өгъялҗ өглһнә эв-арһар кесг бичкдүдин болн спортын талвңгуд тосхгдсн болдг.
Үвлин киитнд, зуни һаң халунд чигн деер келгдсн цуг тоот тосхачнрин алтн һарар күцәгдҗәнә, гиҗ темдглх кергтә. Өцклдүр Хальмгин залврин сүүрин бәәрнд тосхачин сән Өдрт нерәдсн байрин керг-үүлдвр болв. Терүнд таңһчин тосхачнриг йөрәҗ, кесгинь Күндллһнә темдгүдәр ачлв. Энүнә тускар тодрхаһар мана газетин дарани һарцд зәңглхвидн.
КАРСАНА Евгения