Таңһчин нер туурулна!

Бичкдүдин сойлын IV нарт-делкән ик байрт Хальмгин «Тюльпанчик» ансамбль орлцхмн. Таңһчдан темдгтә эн коллектив һазадын ордт чигн нер һарсмн. Олн наадмд орлцҗ, билг-эрдмәрн тодлгдсн ансамблиг ямаран чигн байрин ик нәәрт орлцтха, гиҗ үрвр кенә.

Делкән бичкдүдин сойлын эн керг-үүлдвр дөрвдәд кегдҗәнә. Москван пионермүдин бәәшңгин талвңд байрин нәр болхмн. Ноха сарин 21-әс авн 23 күртл бичкн билгтнр ду-бииһәрн, нань чигн эрдмәрн әмтиг байрлулхмн.
Бичкдүдин билг-эрдмин эн нәәрт Әрәсән цуг регионмудас 2500 һар күн ирхмн. Байрта эн цуглрана йовудт күүкд-көвүд үүдәгч олн харһлтд орлцхмн. Сойлын нер туурсн үүлдәчнр бичкдүдлә харһҗ, соньн күүндврмүд бүрдәхмн. Энд болдг мастер-классмуд бичкн билгтнрт таасгдна. Көгҗм болн хореографь, театр болн цирк, кино болн анимац – эн халхсар мергҗлтән өөдлүлхднь күүкд-көвүдт дөң болхмн. Терүнәс нань музейин эс гиҗ хурлһна эрдмәр соньмсчадг билгтнр чигн үүдәлтин халхар сән медрл авхмн. Урн үгин болн барин халхд седклән тәвсн баһчудт чигн энд соньн олн харһлтс белдгдсн бәәнә. Келхәс, баһ наста билгтнрт эн наадм цуг халхарн билг-эрдмән делгрүлх таал өгчәнә. Мана бичкн биичнр хальмг бииһин ке-сәәхниг үзүләд, талдан һазрас ирсн бичкн артистнрлә таньлдҗ,билг-эрдмән улм делгрүлх хөвтә болҗана.

ҖИРҺЛИН Кермн