Олн үртә эк олзта-туста керг олв

Көтчнр селәнд бәәдг олн үртә эк Аманкан Өлзәт хөрн җил хооран оютн бәәсн цагтан сул цаган тустаһар давулхар шиидәд, «Медрл» төвд үс кирһәчин эрдм дасч авсмн. Сурһулян төгсәснә хөөн эн Көтчнрә районд Сбербанкд, әмтнә социальн харслтын цергллтд, сойлын Герт көдлҗ йовсмн. Һурвн үртә болад, эн күүкдиннь сурһмҗд һол оньг тусхахин төлә сул диг-дарата көдлмш хәәхәр седв. Дәкәд отхн көвүнә эрүл-менд батруллһнд онц оньг кергтә бәәсмн, тегәд өрүн эртәс авн асхн күртл көдлҗ чадшго болв. Тиигәд эн эврә керг бүтәх шиидвр авсмн.

Очр авальтаһан күүндәд, үс кирһәчин эрдмәрн әмтнд туслмҗ күргҗ, эврә керг бүтәхин төлә социальн бооца батлҗ үзх болв. Района социальн харслтын цергллтин мергҗлтнрлә харһад, ямаран бәрмт цаас белдх кергтәг медҗ авад, Өлзәт бер кергиннь зура белдв. Банкд көдлсн төләдән эн кергин олзта-оруһин үүлдврин туск зура дарунь белдҗ терүг харсв. Района социальн харслтын әңглә социальн бооца батлад, күүкд күн эврә кергән эклв. Хамгин түрүнд эн бәәр нәәмәдлҗ авад, авальтаһан тенд сән кец-таал тогтав. Социальн бооцаһар энүнд 350 миңһн арслң йилһҗ өггдв, тер мөңгәр өлг-эд, үс кирһәчд кергтә кергсл хулдҗ авв.
- Эврә керг бүрдәхәс урд нидн һурвн сардан би Элстд дамшлт хоршаҗ авв. Эн халхд олн җилдән көдлҗәдг мергҗлтин һардврт үс кирһлһнә, эд-бод келһнә туст олн зүсн эв-арһ дасв. Күүкд улсин, залусин үс кирһдгин, олн зүсн өңгәр сәәхрүлдгин туст мергҗлтән өөдлүләд, шин медрл хоршаҗ авад, эврәннь кергән эклв. Нидн һаха сарин негнд мана парикмахерск үүлдврән эклв. Эндр нааран Көтчнр селәнә бәәрн улс бәәтхә, талдан селәдин әмтн чигн ирнә. Эврә керг бүрдәсндән би байрта бәәнәв, өдр-бүрин диг-дараг би эврән диглҗ тааста цагла көдлҗ чаднав. Терүнәс иштә һурвн үрндән килмҗән тусхаҗ, өрк-бүлин төрмүдт һол оньг тусхах арһ бәәнә, – гиҗ Өлзәт Нимеевна келв.
Келхд, энүнә үлгүрәр өөрхн үр күүкн бас эврә керг бүрдәҗ, күүкд улст чирә-зүсән сәәхрүллһнә туст туслмҗ күргҗ үүлдҗәнә. Социальн бооцан олн үртә, баһ тетквртә өрк-бүлмүдт, җирһлин күнд таалд туссн улст олз-оруһан икдүлҗ, эврә керг бүрдәхд дөң болдгин тускар эн үүрмүдтән келҗ өгнә. Өөрхн иргчдән эн сарул бәәр олҗ авад, кергән делгрүлх саната. Күнд цагла шаңһа көтлвр энүнд ик урмд өгсиг эн өөдәнәр үнлҗ, талдан улст туста болхар шунна. Долан хонгт нег өдр медәтнрин төлә 50 процентд үс кирһлһнә үниг баһрулх санан бәәнә. Күүкд күүнә келсәр, медәтә улс нааран ирхдән таасна, юңгад гихлә эн эднлә бәәдл-җирһлин тускар күүндҗ, ямр нег төрәр теднә сүв-селвгәр соньмсна, эврән болхла бас медсәрн хувалцна. Нааран ирсн улс сән таалд амрхин төлә эн диван болн телевизор тәвв, чеерүдән күләсн цагт цә ууҗ амрхин төлә таал тогтав. «Би хамгин түрүнд нааран ирсн улсин тускар ухалхар шуннав. Мана парикмахерск района эмнлһнә өөр бәәнә. Тенд талдан райодас чигн әмтн ирҗ эмнлһ авна, тегәд эдн нааран бас ирнә. Дәкәд пүрвә өдр района талдан селәдәс әмтн базрт ирнә, эдн бас манаһур орҗ ирәд, үсән кирһәд, бийән сәәхрүләд хәрнә», - гиҗ бер хувалцҗ келв.
Кергнь ик олз-ору өгдго болв чигн күүкд күн әмтнд туслмҗ күргҗ, эврә керг бүрдәсндән байрлна. Эн бичкндк цагтан үс кирһәч болнав гиҗ эцкдән келдг бәәҗ, тегәд тер санань күцәд, өрк-бүлән теҗәх арһ өгчәхнь энүнд мергҗлтән өөдлүлҗ, шин эв-арһс олзлҗ үүлдхд урмд өгнә. Очр авальнь энүнд ямр нег төр учрхла дөңгән күргҗ, сүв-селвгәрн омг өгнә. Эдн арвн хойр җилдән ээм-ээмән түшлдәд, ниитә бәәнә. Герин эзн түүмр унтралһна цергллт көдлнә. Алина, Данзн болн Мазн күүкднь эк-эцкдән өлзәтә үрд болҗ өсчәнә, эдн ду-биид дурта билгтә бичкдүд мөн. Алина Мацга Анатолийин һардврт үүлддг «Иньглән» студьд орна, көгҗмин сурһульд сурна. Данзн эн җил 2-ч класст орхмн, бас бииһин кружокд орх саната, отхн Мазн дөрвн наста, эн бичкдүдин садт орна. Келхд, эн парикмахерскдан күүкдиннь нердин түрүн үзгүд олзлад «АлДаМа» гидг нер өгсмн.
Селән һазрт өсәд-боссн төләдән Очр болн Өлзәт Аманкаевихн эврә эдл-аху бәрнә. Күүкднь эк-эцкән дахад, бичкнәсн авн мал асрдгиг дасна, эдн үкрмүдиг услад, хотынь өгәд дөң болна. Сул цаг учрхла эдн өрк-бүләрн хамдан амрхдан дурта. Олн үртә экин келсәр, эдн җилд хойр дәкҗ хаврар болн намрар цогц-махмудан батрулхар Ар Кавказин уснд өөмхәр одна. Хамдан давулсн цаг эднә өрк-бүлиг хамцулҗ, байр-бахмҗ үүдәнә.
ДООҖАН Наталья
ЗУРГТ: социальн бооца батлад эврә керг бүрдәсн Аманкан Өлзәт