Энткгәс әрүн тоот авч ирхмн

Эн өдрмүдт мана таңһчд Энткг орн-нутгин делегац ирәд, һаха сард Элстд болх Шар шаҗна нарт-делкән чуулһ угтад, чинртә төрмүдәр болҗадг харһлтст орлцв. Чуулһна йовудт 50 һар олн зүсн керг-үүлдвр давулхар зуралгдҗана. Тер дунд Бурхн Багшин цогцин әрүн тоот Энткгәс Хальмг Таңһчд авч ирхинь күләгдҗәнә. Мел эн төрәр шидр мана таңһчин һардвр болн Энткгин залврин гешүдлә хамдан ирлцңгү селвлцә давулв.
Хальмг Таңһчин Толһач Хаска Бату, залврин ахлач Босхмҗин Гилән, энүнә негдгч дарукс Җамбинә Очр болн Цернә Эрднь, Шаҗн Лам Тензин Чойдак, Гевш Йонтен болн залврин талдан гешүд харһлтд орлцсмн.
Селвлцәнә йовудт Хальмгин Толһач Хаска Бату Шар шаҗна нарт-делкән чуулһна белдврин көдлмшт орлцад, тәвцән орулҗадг Энткгин элчнрт ханлтан өргв. Тер мет Хальмгт Бурхн Багшин цогцин әрүн тоот авч ирлһн мана таңһчин бәәтхә цуг Әрәсән иргнмүдин төлә ончта йовдл болхнь лавта. Мел эн йовдл нарт-делкән чинртә керг-үүлдврт ик соньмслт үүдәҗ, олн-әмтиг орлцулхмн, гиҗ келв.
Шаҗн Лам Тензин Чойдакин темдглсәр, Бурхн Багшин цогцин әрүн тоот мана таңһчд авч иргдәд, орн-нутгасн һарлго мана әмтн энүг үзәд, тууҗлгч өвәрц йовдл болхмн гиҗ заав.
– Шар шаҗна нарт-делкән чуулһна белдврт орлцсндан байрта бәәнәвидн. Хальмгт хойрдад ирҗәнәв, энүнд ик белдврин көдлмш кегдҗәхинь ил үзгдҗәнә. Тууҗлгч чинртә чуулһнд Бурхн Багшин цогцин әрүн тоотыг әәмшг уга бәәдл тогтаһад авч ирлһнә тускар үгцвидн, – гиҗ Москва балһснд бәәдг Энткгин элчллтин сурһуль-эрдмин министр Винай Кумар темдглв.
Тодлхас, Шар шаҗна нарт-делкән чуулһн эклтл сара хонг үлдв. Хальмг Таңһчд шар шаҗна сүзгтнр цуглрҗ, сойлын, сурһуль-эрдмин, номин, спортын болн олн талдан чинртә төрмүд хаһлхмн.
КАРСАНА Евгения