Олна дөңнлтин һурвдгч бәәр секгдв

Шидр Хальмг Таңһчин Толһач Хаска Батун седвәрәр Приютна района Приютное селәнд сойлын Герин ул деер Олна дөңнлтин штаб секгдв. Келхәс, шаңһа көтлврин йовудт мана таңһчд эн һурвдгч штаб болв. Тер мет орн-нутгин муниципалитетмүдт секгдҗәдг штабмуд дунд мана таңһчд нүүрләчнрин тоод орв. Урднь Хальмгт ирлцңгү штабмуд Элст болн Лагань балһсдт секгдәд, өдгә цагт болхла тенд олн зүсн чинртә харһлтс болн талдан керг-үүлдврмүд давулгдна.

Әрәсән Федерацин Хүүвин сенатор Байир Путеев, таңһчин Улсин Хуралын (Парламентин) Ахлач Артем Михайлов, Приютна района толһач Манҗикә Басң, Олна дөңнлтин региональн штабин һардач Бадан Бадм, СВО-н ветеранмудын Ассоциацин һардач Чумуда Николай болн Приютна района бәәрн улс керг-үүлдврт орлцв.
Байрин йовудт олн җилдән района бәәдл-җирһлд, сурһуль-эрдмин болн зака күцәгч үүлдврин делгрлтд тәвцән орулсн төләдән Улсин Хуралын (Парламентын) хойр хуралтын депутат, Приютна олн салврта гимназин һардач Ирина Глушко Әрәсән Федерацин Хүүвин сенаторин Ханлтын бичгәр ачлгдв.
Приютное селәнд секгдсн шин талвңд олна-политическ, социальн, баһчудын болн талдан төрмүдәр керг-үүлдврмүд давулгдҗ, нег һазра улс терүнд орлцад, соньмсулҗадг сурврмудтан хәрү олҗ чадхнь лавта.

ОЛЬДАН Цаһан