Бичкдүдиг сурһульднь белдв

Сурһулин җил эклтл өрәл сар үлдв. Эн өдрмүдт эк-эцкнр күүкдт сурһульднь кергтә хувц-хунр, канцелярск эд-тавр хулдҗ авч цугинь белдҗәнә. Таңһчин әмтнә социальн теткврин комплексн төвин «Өрк-бүл» гидг әңгин хәләврт бәәдг баһ тетквртә, олн үртә өрк-бүлмүдин болн цергә шишлң керг-үүлдврт орлцачнрин бичкдүдиг сурһулин җилд белдхин төлә җил болһн «Сурһуль, менд!» гидг буйнч седклин керг-үүлдвр давулгдна.
- Эн «Эврә сән дурар үүлддг улс - бичкдүдт» гидг Цугәрәсән керг-үүлдврин йовудт арвн дөрвн җил дарандан давулгдҗана. Җил ирвәс олн үртә, баһ тетквртә, җирһлин күнд таалд туссн өрк-бүлмүдин болн цергә шишлң керг-үүлдврт орлцачнрин бичкдүдт демән күргҗ, дөң күргх бүрдәцсин болн онц арһлачнрин то өсәд йовхнь байрта. Мөрн сарас авн һаха сар күртл эн керг-үүлдврин йовудт буйнч секдлин керг-үүлдвр болна. Терүнә йовудт бидн уга-яду өрк-бүлмүдт асргдҗадг бичкдүдиг хувц-хунрар, һосн-башмгар, канцелярск эд-таврар, нань чигн тоотар теткнәвидн. Мана әңгд сурһульд шиңкән орх бичкдүд умшдг, тоолдг дасад, билг-эрдмән делгрүлҗ сурһульд белдвр кенә. Эн җил 19 күүкн-көвүн 1-ч класст орхмн. Эднә эк-эцкнр күүкдт ямаран дөң керглгдҗәхиг келнә, бидн буйнч седклин кергт орлцдг бүрдәцсин болн онц арһлачнрин дөңгәр теднд кергтә тоот хулдҗ авнавидн. Эн җил эн керг-үүлдврин медлд ут тоодан зун шаху күүкн-көвүн сурһульднь кергтә эд-таврар теткгдхмн, – гиҗ КЦСОН-а һардачин дарук Светлана Хинеева келв.
Элст балһсна прокуратурин, зарһин, мөшклһнә заллтын әңгин, Хальмг Таңһчин селәнә эдл-ахун министерствин, медицинск-социальн шинҗллтин бюрон, Әрәсән номин академин Хальмг номин төвин көдләчнр, «Бурхн Багшин Алтн сүм» төв хурлын ламнр, КПРФ-ин таңһчд үүлддг әңг болн онц арһлачнр күүкд-көвүдт буйнч седкләсн демән күргҗ, шин сурһулин җилд белдхд дөң болв. Эдн бичкдүдт бат эрүл-менд дурдҗ, сурһулян сәәнәр сурч, билг-эрдмән делгрүлҗ, эк-эцкнртән өлзәтә үрд болтн гиҗ йөрәв.
Олн үртә экнр Бадан Татьяна болн Үлмҗин Анна күүкдиннь болн талдан эк-эцкнрин нерн деерәс таңһчин әмтнә социальн теткврин комплексн төвин көдләчнрт болн буйнч седкләсн демән күргсн улст ханлтан өргв. Татьяна берин келсәр, эн һурвн үртә, Тагир 7-ч класст болн Дарина 2-ч класст орхмн. Эдн хотл балһсна 21-ч тойгта дунд сурһульд сурна. Эн күүкдтәһән төвин «Өрк-бүл» гидг әңгд болдг керг-үүлдврмүдт шунмһаһар орлцна. Үлмҗин Анна болхла тавн үртә эк, эднә өрк-бүлд һурвн оютн болн хойр сурһульч бәәнә. «Максим болн Николь сурһульд белдлһнә кичәлд ордг билә. Эн җил Максим 8-ч класст орхмн. Отхн Николь түрүн болҗ сурһульд орҗана, эн җилин эргцд кичәлмүдт орлцад, умшдг, тоолдг дасв. Күүкмдн сурһульд орхдан белн бәәнә, энүг багш Мутян Владимир сәәнәр белдв. Бидн өрк-бүләрн нааран ирҗ, олн зүсн марһаст, байрин керг-үүлдврмүдт орлцнавидн. Олн үртә өрк-бүлмүдт төвин мергҗлтнр килмҗән тусхаҗ, олн төрәр дөң-тусан күргнә. Бидн цугтаднь ханлтан өргҗәнәвидн. Буйнч седкләсн демән күргсн бүрдәцсин көдләчнрт болн арһлачнрт бас ик ханлт өргҗ, хөв-кишг дурдҗанавидн. Мана бичкдүд сурһулян сәәнәр суртха», – гиҗ олн үртә Анна Георгиевна келв.
Келхд, таңһчин әмтнә социальн теткврин комплексн төвин «Өрк-бүл» гидг әңг хотл балһсна 1-ч микрорайона хуучн герт бәәршлдг бәәсмн. Ода болхла эдн төвин шин бәәрнд нүүҗ, өдгә цага сән таалд керг-үүлдврмүдән давулҗана.

ДООҖАН Наталья
ЗУРГТ: Элст балһсна прокурор Һәрән Баатр бичкдүдт белг бәрүлҗ өгчәх кем