Гиичнрән сәәнәр тосхар белдҗәнә

«Мини бизнес» төвд ресторатормудын төлә шишлң көтлвр экләд күцәгдҗәнә. Novikov Group бүрдәцин шинҗләч Евгения Лерман терүг давулҗана.
Novikov Group мана орн-нутгт гиичнр тосхлһна халхд хамгин дамшлтта бүрдәц болна. Нег һазра мана арһлачнр эднәс үлгүр авч дасчахнь йир сән йовдл мөн.
– Хальмгин ресторатормуд сән дамшлт авад, нег һазра улстан болн мана таңһчд ирсн гиичнрин төлә ирлцгү сән туслмҗ өгхинь лавта. Шар шаҗна нарт-делкән чуулһ угтад иим сурһуль давҗахнь бас темдгтә. Өвкнрин авъяс болн өдгә цагин туслмҗ хоорндан нииләд, гиичнрән сәәнәр тосхвидн, – гиҗ таңһчин Толһач Хаска Бату иткүлв.
ОЛЬДАН Цаһан