Эмчнр хол селәдәр йовҗана

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин һурвдгч девсң экләд, эмчнр Яшалтан, Көтчнрә, Лаганя, Сарпан, Приютна, Үстин болн Городовиковск райодт одв. Эн керг-үүлдврин йовудт эмчнр хол селәдин әмтнд күрч, олн зүсн шинҗллт кеҗ, эмнлһнә туст сүв-селвгән өгч, түрүн дөң күргҗәнә.
Приютна районд эмчнр Песчаный болн Приютное селәдт көдлв. Эн өдр ут тоодан 114 күн эмчд бийән үзүлв. Тер тоод цергә шишлң керг-үүлдврт орлцачнрин 12 өрк-бүл мергҗлтнрин хәләврт орҗ, эрүл-мендин бәәдлин туст соньмсулҗадг төрәр цәәлһвр авв. Района әмтнд маммографь, флюорографь кехин төлә шишлң көлгн-күчнд углҗ тәвгдсн кергсл олзлгдв. Тер мет әмтн ВИЧ, гепатит болн нань чигн гем илдкҗ авхин төлә цусна шинҗллт кев. Района эмнлһнә ах эмч Лариса Чубован темдглсәр, бәәрн әмтн эн керг-үүлдврт шунмһаһар орлцад, эмнлһнә туст мергҗлтнрлә күүндәд, сүв-селвг авв. Иим керг-үүлдвр хол селәдт бәәдг улсин төлә эрк биш бүрдәх кергтә гиҗ эн келв.
Сарпан районд эн керг-үүлдвр Уманцево болн Садовое селәдт бүрдәгдв. Хам-хоша бәәдг селәдин улс бас терүнд орлцхар ирснь темдгтә. Невролог, отоларинголог, хирург, эндокринолог, офтальмолог, кардиолог, акушер-гинеколог эмчнр бригадын ханьд орв. Сарпан района эмнлһнә поликлиникин һардач Лиҗин Лидиян келсәр, Уманцево селәнд 49 күн, Садовое селәнд болхла 50 күн эрүл-мендән шинҗлв. Эмчнрин хәләврт орсн улс дундас һурвн күн эмнлһ авлһнд болн немр шинҗллт келһнд 13 күн йовулгдв. Эмчнр цергә шишлң керг-үүлдврт орлцачнрин өрк-бүлмүдин гешүдт болн гемтә-шалтгта улст онц оньг тусхаҗ, кергтә болхла гертнь одҗ дөңгән күргв.
Үстин районд эмчнр хойр өдртән көдлв. Түрүн өдр эдн Бергин селәнд одв, маңһдуртнь Цаһан Амнд әмтиг хәләв. Района әмтн эмчнр ирснд байрлҗ, иим керг-үүлдвр бүрдәгдсиг өөдәнәр үнлв. Бергин селән таңһчин хотл балһснас болн района төв селәнәс хол бәәнә, тегәд бәәрн улс нааран кесг мергҗлтнр ирсиг медәд, эднд бийән үзүлхәр адһв. Эн өдр эмчнр 80 кү хәләв, тер тоод һурвн күүнд гертнь одад эмнлһнә туст дөңгән күргв. Эмчнр 56 күүнд эмнлһнә туст селвгән өгв, 5 күн П.Жемчуевин нертә таңһчин эмнлһнд немр шинҗллт болн сән эмнлһ авхин төлә йовулгдв. Района эмнлһнә ах эмч Церн Теблеевин темдглсәр, эн керг-үүлдвр ямр нег гемиг эртәр илдкҗ авад цаглань эмнлһ кехд туслна.
Келхд, эн сарин эклцәр района эмнлһнә эмчнр цергә шишлң керг-үүлдврин ветеранмудын диспансеризац давулсн билә. «Төрскән харсачнр» гидг шаңһа саңгин таңһчд үүлддг әңгин Үстин районд көдлдг социальн зүүцүләч Каюка Александра цергә керг-үүлдврт орлцачнр эмчнрт бийән үзүлҗ, цаглань кергтә эмнлһ авхд ик оньг тусхаҗ дөң-тусан күргнә. СВО-д орлцсн нег һазра улс мергҗлтнрин хәләврт орад, гүн шинҗллт кев.
Эн долан хонгт эмчнр батлгдсн диг-дарала ирлцәтәһәр Яшкулин, Хар Һазра болн Баһ Дөрвдә райодт одхмн.

БАТАН Сәәхлә
ЗУРГТ: «Эрүл-менд бәәтн!» гидг керг-үүлдвр Үстин районд болҗах кем