Нүүрләчнрин тоод орвидн

Одахн Әрәсән залврин кесн то-дигәр зуульчллһн делгрүлҗәдг орн-нутгин регионмуд дунд мана таңһч нүүрт һарв гисн байрта зәңг ирв.
– Сүл җилмүдт мана таңһчд ирдг зуульчнрин то өсчәхнь цуһар меднә. Гиичнр таңһчин бумблвс хәләсн деерән мана тууҗар, сойлар, авг-бәрцәр бас соньмсна. Мана тал ирсн хөөн олн-әмтн ниигмин сүлҗәнд эврәннь үзсән-медсән бичҗ, ухан-тоолврарн хувалцна. Хальмг Таңһч мел чидл өгдг һазр болҗахнь цуһар медүлнә. Мадна төлә болхла гиичнрин ухан-седкл бахмҗ болна. Цааранднь чигн нег һазра улсин болн гиичнрин төлә сән кец-таал тогтахар шунҗанавидн, – гиҗ Хальмгин Толһач Хаска Бату темдглв.