Ясвриг бүрткҗәнә

Хальмг Таңһчин Улсин Хуралын (Парламентин) депутатнр селәдин дунд сурһульмудт күцәгдҗәдг бат ясврин йовудыг бүрткҗ, тосхлтын көдлмш өөдән чинртәһәр күцәгдхиг шинҗлнә. Эн җил мана таңһчд «Сурһуль-эрдмин халх шинрүллһн» гидг шаңһа көтлврин йовудт 10 дунд сурһульд болн 2 бичкдүдин садт бат ясвр кегдҗәнә.

Тиигәд депутатнр Кокан Михаил болн Никитинә Айс Троицкое селәнд Б.Б.Городовиковин нертә гимназьд одв. Тенд ясврин көдлмш төгсхдән өөрдҗ йовна. Тер мет депутатнр шар шаҗна нарт-делкән чуулһ угтҗ, Троицкое селәнә хурлд кегдҗәдг ясвриг бас хәләв. Эндр хурлын эргндк һазрт сән кец-таал тогталһна көдлмш күцәгдҗәнә. Депутатнр Елена Лотник болн Яков Герман Яшалтан района Октябрьск дунд сурһульд, Александр Аздоров болхла Городовиковск балһсна 3-ч тойгта дунд сурһульд одв. Мацга Татьяна болн Кокан Михаил Чкаловский селәнә дунд сурһульд ясврин көдлмшиг бүрткв. Ясврин көдлмш батлгдсн диг-дарала ирлцәтәһәр болн өөдән чинртәһәр күцәгдх зөвтәг депутатнр некв.