КТК – билгтә баһчудт

Урҗ өдр Элст балһсна төв талвңд «КТК–Р» акционерн бүрдәц «Таңһчин баһчудын төв» бүрдәцд болн Е.Толкачевин нертә «Тюльпанчик» бииһин бичкдүдин ансамбльд өдгә цага шин автобусмуд белглв. Байрта керг-үүлдврт Хальмг Таңһчин залврин Ахлач Босхмҗин Гилән, КТК-н һардач Николай Горбань болн акционерн ниицәнә орн-нутгин залврла залһлда батруллһна төрәр һардачин дарук Михаил Гришанков орлцв.
Нер һарсн бииһин ансамблин күүкд сәәхн хальмг би бииләд, күндтә гиичнрт хадг татв. Келхд, эн җил бичкдүдин ансамбль 30 җилин өөнән темдглҗәнә, шаңһа чинр зүүһәд дигтә 10 җил болв. Евгений болн Людмила Толкачевихн энүг һучн җил хооран бүрдәһәд, эн җилмүдин эргцд 300 һар артистиг белдв. Эндр ансамбльд биилҗ йовсн күүкд-көвүд өсәд-босад таңһчин талдан үүдәгч коллективст биилҗәнә, зәрмснь бииһин ансамбльмуд һардҗана.
- Хальмг Таңһчин Толһач Хаска Батун болн таңһчин залврин нерн деерәс акционерн ниицәнә һардврт ик ханлтан өргҗәнәв. Тана буйнч седклин төсвс таңһчин сойлын, эрүл-менд харлһна, сурһуль-эрдмин бүрдәцсин материальн-техническ ул батрулна, эргндк йиртмҗ харлһна төрмүд хаһллһнд ик тәвц орулна. Тиигәд, «Төрскн һазриннь йиртмҗ хадһлый!» гидг көтлврин йовудт гөрәсдин то икдв. Түрүн болҗ сурһульд орҗадг бичкдүдт белг бәрүлҗ өглһн, «КТК – билгтә бичкдүдт» гидг билг-эрдмин марһан сән авъяст тохрв. Мана таңһчд бәәдг улсин һурвдгч хүвнь баһчуд болна, тегәд эндр эднд шин көлг белглҗәхнь ик байрта болн ончта йовдл болҗана. Билгтә, седвәртә, төрскнч седклтә баһчуд мана таңһчин болн орн-нутгин иргч мөн, – гиҗ Гилән Герасимовна йөрәлин үгдән келв.
КТК-н һардач Николай Горбань бичкдүдт болн баһчудт күцәмҗ дурдҗ, акционерн ниицән буйнч седклин кергт ик оньг өгдг билә, цааранднь чигн эн халхар үүлдврән делгрүлх гиҗ темдглв. Сүл җилмүдт КТК сойлын бүрдәцсиг шин көлгәр болн кергсләр теткв. Тиигәд, 2022 җилд «Өөрднр» бииһин театр, 2023 җилд Манҗин Аркадин нертә шаңһа филармонь өдгә цага автобуста болв, 2024 җилд Н.Пальмовин нертә Келн-улсин музейд экспозицс зөөдг шишлң көлгн белглсн билә. Нидн КТК таңһчин хазнд 3 җува арслңга алв орулҗ өгв. Сар хооран акционерн ниицән Ик Буурла болн Хар Һазра райодын сойлын болн жилищн-коммунальн эдл-ахун бүрдәцсиг көлгәр теткв. Таңһчин баһчудын Төвд болн «Тюльпанчик» ансамбльд «Yotong» тамһта автобусмуд хулдҗ авлһнд КТК 35 сай 400 миңһн арслң һарһв.
«Тюльпанчик» ансамблин билг-эрдмин һардач Людмила Толкачева болн таңһчин баһчудын Төвин һардач Саңһҗин Эрднь иим үнтә болн кесгәс нааран күләҗәсн белг белглснд ханлтан өргв. Билгтә бичкдүд «Чичрдг» би биилҗ, байрин керг-үүлдвриг ашлв. Урҗ өдр асхар бииһин ансамблин күүкд-көвүд Москва балһснд болх марһанд шин автобусарн һарч йовв. Цуһар эднд цаһан хаалһ болн күцәмҗ бәрәд хәрҗ ирхиг дурдв.
ДООҖАН Наталья