Көгҗмин даалһвр өгв

«Энтн мана өрк-бүлин авъяс» гидг марһанд орлцачнрт дарани даалһвр өггдв. «Әрәсә – эв-арһсин орн-нутг» гидг президентск төсвин хүүвин гешүд Әрәсән нертә артистнр Игорь Бутман болн Дмитрий Маликов марһанд орлцачнрт көгҗмин хойр даалһвр өгв. Даалһвриг күцәмҗтәһәр күцәһәд, хамгин ик балл хоршасн өрк-бүлмүд марһана полуфиналд һархмн.

Тер мет марһанд орлцачнрт спортивн даалһвр өггдв, эдн «Спортар соньмстн!» гидг төрәр зург зурх зөвтә. Ода деерән марһана алс зәәһин эв-арһар девсң болҗана, өрк-бүлмүд бийиннь, күцәмҗин, соньн йовдлмудын, өрк-бүлин тууҗин, авъясмудын туск видео цокч авх зөвтә. Эн девсң хулһн сарин 1-д төгсхмн.
Әрәсән марһанд орлцхин төлә һаха сарин 14 күртл эрлһән орулх кергтә. Өрк-бүлин командд һурвн үйин баһ гиснь дөрвн күн орлцх зөвтә. Тер мет командын ханьд 5-ас авн 17 нас күртл нег элч эрк биш бәәх зөвтә. Марһанд диилвр бәрсн 60 өрк-бүлд гер-бүүрин таал ясрулхд 5 сай арслңга сертификат бәрүлҗ өггдхмн. Марһана ашлгч девсңд һарсн өрк-бүлмүд орн-нутгин регионмудар зуульчлх. Нидн болсн марһанд Хальмг Таңһчас Корниенкон өрк-бүл орлцад, Владивосток балһснд одҗ амрсн билә. Эн җил мана таңһчас 82 өрк-бүл марһанд орлцхан медүләд, эрлһән орулсн бәәнә.
БАТАН Наталья