Мана төсвс дииләчнрин тоод орв

Цугәрәсән марһана ашар Хальмг Таңһчин хойр балһснд сән кец-таал тогтагдхмн. «Балһсдын болн тууҗлгч селәдин делгрлт» нертә 2025 җилин марһанд орлцхар орн-нутгин регионмудас ут тоодан 424 эрлһн орҗ ирв. Мана таңһчас Городовиковск, Лагань болн Элст балһсдас һурвн төсв эрлһән орулсн болдг. Шидр марһана ашар мана хойр төсв дииләчнрин тоод орв гисн байрта зәңг ирв.

Лаганьд Ноһан дәркин парк тосхгдхмн, Элстд болхла Колонский боодгин эргндк һазртнь сән кец-таал тогтагдхмн.
– Элст балһсна бәәрн улсин төлә Колонский боодг зуни цагт усна өөр амрдг һанцхн орм болна. Төсвин йовудт тенд шишлң 10 орм бүрдәгдхмн. Амфитеатр, экологическ хаалһ, спортын талвң болн талдан кесг тоот тосхгдхмн. Лагань балһснд болхла Ноһан дәркин парк тосхгдад, нег һазра улсин төлә бәәтхә, Хальмгт ирдг гиичнрин төлә бас әрүн чинртә, һәәхмҗтә орм болхмн. Эн сәәхн ормс тосхгдад, таңһчд зуульчллһ делгрүллһнд бас туслхмн. Мадниг даңгин дөңндг Әрәсән залврин Ахлач Михаил Мишустинд, энүнә дарук Марат Хуснуллинд, орн-нутгин тосхлтын болн ЖКХ-н министр Ирек Файзуллинд ханлтан өргҗәнәв. Тер мет Элстин һардврин толһач Лиҗикә Алдриг болн Лаганя района толһач Коган Юрийг эднә һардҗадг муниципалитетмүд диилвр бәрснлә йөрәҗәнәв, – гиҗ Хаска Бату онц темдглв.
ОЛЬДАН Цаһан