Әмтн яһҗ меклгднә...

Өдр болһн таңһчин барин һарцст болн ниигмин сүлҗәнд мек-тах һарһдг улс әмтиг мекләд мөңгинь эзләд авна гисн зәңг һарна. Өдр ирвәс телефоһар меклгдсн улсин то өсәд йовна. Эн туст МВД-н көдләчнр зәңгллһнә эв-арһсар дамҗад саг бәәтн гиҗ мана умшачнрт кедү дәкҗ бичсн болх гинәт. Тер бийнь меклгдсн улсин то баһрҗахш.

Мек-тах һарһдг улс ямаран чигн худлан келәд таңһчин әмтнәс мөңгинь хулхалҗ авна. Полицин көдләчнр болхла эн туст нег һазра улсан даңгин саглулна. Телефоһар таньдго улс җиңнүлхлә, удандан бичә күүндтн, эдн цуһар мек-тах һарһдг улс болҗ һарна. Зуг олн-әмтн теднд иткәд, полицин зәңгллһиг учртан авлго мөңгән геенә.
Шидр таңһчин МВД-н зәңглсәр, нег һазра мана улс дәкнәс меклгдв. Таңһчин иргнмүд кесг сай һар арслң геесмн. Өдр болһн мек-тах һарһдг улс мекллһнә туст шин эв-арһс олзлна.
Ниигмин сүлҗәнд таңһчин министерствсин болн олн бүрдәцсин һардачнрин йосн биш халх үүдәһәд, тенд зургудынь барлна. Тендәс олн-әмтнд бичгүд бичнә. Банкин картднь бәәдг мөңгнә әәмшг учрҗана гиҗ худлан бичәд, әмтнд илгәнә. Хөөннь Әрәсән Төв банкин эс гиҗ зөв-йос харлһна көдләчнр болад җиңнүлнә. Психологуд мет удандан күүндәд, әмтнә, тер тоод медәтә улсин, толһаһинь йосндан эргүлнә. Аштнь әмтн иткәд, бәәсн мөңгән геенә.
Сүл цагт полицин көдләчнр гетллһнә туст ирлцңгү керг-үүлдврмүд давулдг болв. Элстин уульнцсар, лавксар, олн бүрдәцсәр йовҗ, мек-тах һарһдг улсин зуран тускар өргнәр зәңглнә. Күндтә нег һазра улс! Таньдго улс җиңнүлхлә эс гиҗ ниигмин сүлҗәнд таднд бичхлә, иткхмн биш. Иим улст эврә бәрмт цаасна тоотынь чигн келхмн биш. Кемр тиим йовдл учрхла, тер дарунь гилтә полицд зәңглтн, гиҗ таңһчин МВД дәкнәс тодлулҗана.

КАРСАНА Евгения