Талтаевихн Әрәсән өрк-бүлмүд дунд ончрв

Шидр Көтчнрә районд бәәдг өнр-өсклң Баатр болн Надежда Талтаевихнә өрк-бүл «2025 җилин сән гисн өрк-бүл» гидг Әрәсән марһанд «Өвкнриннь авъяс хадһлдг өрк-бүл» гидг әңгд диилвр бәрснә туск байрта зәңг ирв. Эднә өрк-бүл хаврин чилгчәр эн марһана таңһчин девсңд диилвр бәрсн билә. Хальмг Таңһчин Толһач Хаска Бату эдниг диилвр бәрснләнь йөрәв.
- Талтаевихн келн-улсин авъяс әрүнәр хадһлҗ, күүкдтән чик сурһмҗ өгч, көдлмшч болн төрскн һазртан эңкр улс болҗ өсхднь нилчән күргв. Иим өрк-бүлмүд мана таңһчин болн орн-нутгин бат ул болна. Урднь хальмг өрк-бүлмүд олн үртә бәәсмн. Эндр чигн өнр-өсклң өрк-бүл болдг авъяс эркн чинр зүүҗәхнь байрта. Ода мана таңһчд олн үртә 8 миңһн өрк-бүл бәәнә, – гиҗ Бату Сергеевич темдглв.
Баатр болн Надежда Талтаевихн хөрн һурвн җилдән ниитә бәәнә. Эдн дөрвн күүктә болн хойр көвүтә, цуһар эдн өлзәтә сән үрд болҗ өсв. Ууһн Намҗл эмчин эрдм шүүҗ авв, эн Москва балһснд Пироговин нертә РНИМУ-д медрлән гүүдүлҗәнә Мираида Ростов-на-Дону балһснд ик сурһулиг йилһән сәәнәр төгсәһәд, тенд аудиторск бүрдәцд көдлҗәнә. Баира эн җил дунд сурһулян төгсәһәд, иргчдән бас эрүл-менд харлһна көдләч болхар зуралҗана. Арслан болн Виктория Х.Косиевин нертә олн халхин гимназин сурһульчнр мөн, отхн Талта «Сайгачонок» бичкдүдин садт орна. Зурһан үрнь сурһулян сәәнәр сурч, олна бәәдл-җирһлд шунмһаһар орлцҗ, эк-эцкиннь нериг дуудулна гиҗ келх кергтә.
Олн үртә эк-эцк хойр олн җилдән Әрәсән МЧС-ин Хальмг Таңһчар үүлддг заллтд түүмр унтарлһна цергллтд көдлсмн. Баатр Георгиевич ачта амрлһнд һарсна хөөн крестьянск-фермерск эдл-аху бүрдәһәд, төрскн селәндән мал асрҗ олзта-тустаһар көдлҗәнә. Надежда Сергеевна Көтчнрә района түүмр унтралһна цергллтд диспетчерәр көдлнә, эн района күүкд улсин хүүвин гешүн болҗ олна бәәдл-җирһлд шунмһаһар орлцна. 2018 җилд эдн Хальмг Таңһчин Толһачин зәрлгәр «Күүкдтән чик сурһмҗ өгсн төлә» гидг темдгәр ачлгдсмн.
Герин эзн Цаһан Нуура һазра талтахн арвна күн болна. Өвкнь Талтан Маңка 1812 җилд болсн дәәнд Хальмг полкин зун дәәчин командир бәәсмн, зөрмгән үзүлсн төләдән әрүн Аннан 3-ч девсңгин орденәр ачлгдсмн. Төрскән харсгч Алдр дәәнд орлцад, Сталинград балһсна харсач Талтан Надмид зөрмг өвкнриннь нериг туурулсмн. Һундл төрхд, Надмид Санджиевич 1942 җилд дәәнә һалд зәңг-зә уга геедрсмн.
Урҗ өдр Талтаевихнә өрк-бүлд байрта болн ончта йовдл учрв. Мираида күүкнь хәрд һарв. Әрәсән марһанд диилвр бәрснә байрта зәңг дигтә хүрмин өдрлә ирснь хойр дам бахмҗта болв. Талтаевихнә өрк-бүл намртан Москва балһснд болх ик нәәрт орлцҗ, Әрәсән сән гисн өрк-бүлмүдлә хамдан ачлгдхмн.
ДООҖАН Наталья
ЗУРГТ: өнр-өсклң Талтаевихнә өрк-бүл