Залу-зөргин орденәр ачлгдв

30-08-2025, 10:13 | Общество

Хальмгин олн көвүд цергә шишлң керг-үүлдврт зөргәрн нер һарад, өөдәнәр ачлгдснь йир олн болҗана. Өвкнрин дәәч туурмҗар омг авад хальмг көвүд эндрк хөвтә җирһлин төлә әмән әрвллго дәәлдҗ йовна. Тәднәс кесгнь дәәч үүрмүдән хортнас харсад әмнәсн хаһцсмн. Тер баатрмудын негнь Чингиз Ситняков болв.
Эн көвүн олн-зүсн эрдм дасч, төрскн һазрин делгрлтд орлцх күслтә бәәсмн. Дунд сурһулин йисдгч класс төгсәһәд Элстин автохаалһин колледжд сурад, юристын эрдмтә болсмн. 2013 җилд Чингиз Элстин училищд сурад, замчин эрдмәр дамшсн болдг. Эн эрдмәрн Москвад болн Санкт-Петербургд көдлҗ йовла. 2015 җилд бооца батлад церглв.
Дәәнә түрүн дамшлтыг тер җилд авсн мөн. Донецк
Улсин Республикд тиигхд церглсн билә. Цергә шишлң керг-үүлдвр эклснә дару 2022 җилин мөчн сард эврә дурар дәкнәс цергт мордв. Энд Чингиз «Барсин» 5-ч отрядт орад, зөргтә залу болҗахан медүлв. Өгсн даалһвриг эрк биш күцәдгтнь һардвр цергчиг үнлдг билә.
Донецк Улсин Республикин Долина бәәрнә өөр болсн дәәлдәнә йовудт цергә даалһвран күцәҗ йовад Чингиз Ситняков хортна сумнла харһад, әмнәсн хаһцв. Тер дәәлдәнә тускар хамдан церглҗ йовсн Унһна Җирһл иигҗ бичҗәнә: «2022 җилин мөчн сарин 18-д даалһвр күцәһәд, Краматорск района Долина бәәрнд өөрдҗ йовхла маднд нөкд болҗ Чингиз Ситняков болн Чимдән Алексей ирсмн. Эдн Алексей Николаевин цергин багт орлцла. Долинад өөрдәд ирхлә, бидн таваһад күн орсн багмудар хувагдад, даалһвран эклвидн. Гер болһниг харсч зогсвидн. Тедн мана бәәршсн герәс хаалһ һатц зүн бийдк герт бәәв. Гермүдт орсн цагас авн хортна дәврлһн чаңһрад бәәв. Мадна эзлсн гермүд украин нацистнрин бүслврт тусад, күчтә бәрлдән болв. Тендәс цухрҗ һарлһнла Чингиз Ситняков дәәч үүрмүдән харсад үлдв. Автоматар зогслго хортыг хаһад дарунь пулемет авад, хортна дәврлһиг зогсахар седв. Дәәлдәнә йовудт пулеметын сумнь чиләд, терүгинь сольтл хортын снайперин сумн мана цергчин әмнднь күрв. Чингиз тиигәд дәәч үүрмүднь хортнас заагрҗ һартл, әмд үлдхднь туслв».
Зөргтә цергчин, хальмг көвүнә баатр йовдлнь өөдәнәр үнлгдв. Әрәсән Президентин Зәрлгәр Чингиз Ситняков Залу-зөргин орденәр ачлгдсмн. Баатрин ачлвриг экднь бәрүлҗ өгв. Экнь Кеемә Павловнан тодлсар, тер ачлвриг Городовиковск района муниципальн бүрдәцин һардврт бәрүлҗ өгсн билә. Района толһачин дарук Роман Колыбин, Городовиковск болн Яшалтан райодар үүлддг цергә комиссар Хоҗһра Адьян, Хальмг Таңһчд үүлддг «Төрскән харсачнр» саңгин Городовиковск әңгин социальн зүүцүләч Хавляка Эльвира зөргтә дәәчин нериг тодлулҗ, баатр йовдлынь үнлсн санлын хургт орлцсмн. Района һардачнр зөргтә көвүнә баатр үүлдвринь темдгләд, санлынь күндләд, Төрскндән итклтә баатр көвү өсксн экднь Чингизин ачлвриг бәрүлҗ өгсмн.
Хальмгин баатрмудын нерд дунд Чингиз Ситняковин нерн мөңкинд орв.
ҖИРҺЛИН Кермн

Видео