Шатр болн дөөв наадв

«Негдсн Әрәсә» партин седвәрәр мана орн-нутгт «Әрәсән күчн» гидг спортын керг-үүлдвр зарлгдсн бәәнә. Терүнә йовудт нүднә харань муурсн улсин Цугәрәсән олна ниицәнә таңһчд үүлддг әңг шатрар болн дөөвәр марһа давулв.
Элст балһсна Хургин Ахлач Максим Сорокин, Хальмг Таңһчин залврин Ахлачин дарук – таңһчин то-дигин делгрлтин министр болн таңһчин шатрин федерацин ахлач Этән Алексей, шатрин спортын сурһулин һардач Утнасна Александр марһанд орлцачнриг йөрәв. Нүднә харань муурсн улс дунд шатрар болн дөөвәр марһан дару-дарунь давулгдҗ, эрмдгтә улсиг хамцулдгиг эдн темдглв. Марһанд ут тоодан 20 күн орлцв. Күүкд улс дөөв наадв, залу улс болхла шатр болн дөөв наадад, дииләчнриг йилһҗ авв. Марһана йовудт эдн эв-дован үзүлсн деерән хоорндан таньлдҗ, бәәдл-җирһлиннь тускар хувалцҗ, цаган сергмҗтәһәр давулв.
Марһана ашар Ик Буурла районас Боган Борис залу улс дунд диилвр бәрв. Энүнлә хамдан Китан Валентин Баһ Дөрвдәс болн Эвән Андрей Элстәс бас дииләчнрин тоод орв. Элстд бәәдг Анатолий Лесников цугтаһаснь сәәнәр дөөв нааддгнь медгдв. Хотл балһсна бәәрн улс Бимбин Данияр болн Һәрән Анатолий 2-ч болн 3-ч ормс эзлв. Күүкд улс дундас Яшкулин района Цаһан Усн селәнәс Манҗин Елизавета ончрв. Элстд бәәдг Мукөвүнә Светлана болн Манҗин Ляля дөөв сәәнәр нааддган иткүлв. Марһанд диилвр бәрсн улс мөрәлгдв.
- Сән авъяст тохрсар, буйнч седклтә арһлачнр гемтә-шалтгта улс дунд иим керг-үүлдврмүд бүрдәлһнд дөң-тусан күргнә. «Калмыцкая кухня № 1» кафен эзн Соятина Басана марһанд орлцачнриг сенр хотар тооһад, эднд хамдан амрхд сән таал тогтав. Эн марһа бүрдәлһнд дөң болсн цуг улст ханлтан өргҗәнәвидн. Мана олна ниицәнә гешүд спортын марһаст, билг-эрдмин керг-үүлдврмүдт орлцҗ, цаган соньнар давулхдан таасна. Иим харһлтс эднд ик урмдта болна, - гиҗ нүднә харань муурсн улсин Цугәрәсән ниицәнә таңһчд үүлддг әңгин ахлачин нөкд Оруса Лидия келв.
БАТАН Наталья