Балһсна байриг өргмҗтәһәр темдглхмн

Мана таңһчин хотл Элст балһсн 160 җилин өөнән темдглхәр белдҗәнә. Ончта өөн угтҗ балһснд сән кец-таал тогталһна, шин хаалһс тосхлһна, бүрдәцсин болн гермүдин бат ясврин көдлмш кегдҗәнә. Шидр Элст балһсна һардврин толһачин дарук Довгопола Дмитрий болн балһсна һардврин сойлын заллтын һардач Эрднин Данзн олнд зәңгллһнә эв-арһсин көдләчнрлә харһад, өөнин керг-үүлдврмүдин тускар келҗ өгв.
- Эн сарин чилгчәр мана таңһчд шаҗна нарт-делкән ик хург болхмн, тегәд терүг угтҗ Элст балһсна 160 җилин өөнин керг-үүлдврмүд болхнь ик дааврта болн ончта болҗана. Эн җил балһсна өөнд нерәдгдсн керг-үүлдврмүд дөрвн өдрин туршарт, һаха сарин 18-әс авн 21 күртл болхмн. Тиигәд, һаха сарин 18-д бичкдүдин үүдәлтин бәәшңд Ирина Долгинан цокч авсн фильм үзүлгдхмн. Терүнд мана хотл балһсна тууҗин, босхмҗин болн делгрлтин, эндрк өдрин тускар келгдхмн. Балһсна өөнд нерәдҗ спортын халхар кесг марһас болхмн. Һаха сарин 20-д болхла Элст балһсна 160 җилин өөнд нерәдгдсн байрин хург болхмн, терүнд сән авъяст тохрсар балһсна делгрлтд тәвцән орулсн улсин ач-тус темдглҗ, ачлврмуд бәрүлҗ өггдхмн, «Җилин сән гисн күн» марһанд диилвр бәрсн улсин нерд заагдх. Нарн өдрлә Элстин ипподромд мөрнә болн нохасин урлдан болхмн. Келхд, нохасин урлдан мана балһснд түрүн болҗ давулгдхмн, энтн үзмҗтә керг-үүлдвр болхнь лавта. Элстд грейхаунд тохма нохастаһан, олн зүсн марһаст орлцдг улс бәәнә. Мөрнә болн нохасин урлдана дииләчнрин төлә үнтә белгүд, тер тоод гиигн машин белдгдв, - гиҗ Дмитрий Сергеевич келв.
Эн җил балһсна Өдрт нерәдгдсн керг-үүлдврмүд нурһлҗ Элстин төвд болхмн. Тиигәд, олн келн-улсин ниицәсин, күч-көлсч коллективс һәәхмҗтә нәр-нааднд орлцхмн, Көглтин Даван болн Александр Пушкинә бумблвсин өөр шүлгүд умшхмн, шинрүлгдсн «Родина» сойлын төвин талвңд концерт, бичкдүдин тергдин хәләвр, һар цаас кеҗәдг баһчудын нәр давулгдхмн. Эн өдр таңһчин билгтнр болн көгҗмин сурһульмудын бичкдүд Элстин туск дуд дуулҗ, эңкр балһсндан көгҗмин белгән нерәдхмн.
Довгопола Дмитрийин темдглсәр, мана таңһчд болн балһснд Элистина нертә күүкд улс бәәнә, тегәд эднд онц оньг өггдхмн. «Родина» сойлын төвин талвңд һаха сарин 20-д асхар болх концертд балһсна нер зүүдг күүкдт белг белглҗ, эднә тускар олнд медүлхмн.
- Байрин керг-үүлдврмүдин көтлвриг нертә режиссер Сарңга Алексей белдв. Эн өдрмүдт олн зүсн марһас, харһлтс, байрин хургуд болн нань чигн керг-үүлдвр болхмн. Мана балһсна әмтн болн гиичнр, сән кец-таал тогтагдсн ормд өрк-бүләрн сергмҗтәһәр амрч чадхмн. Мана тал 6 делегац ирхән медүлв, тиигәд хам-хоша бәәдг балһсдас болн Луганскас гиичнр ирхиг күләҗәнәвидн. Олн келн-улсин Ассамблейин мана таңһчд үүлддг әңглә хамдан келн-улсин сойлын наадм давулхвидн. Эн җил нертә артистнриг дуудсн угавидн, тер юңгад гихлә мана таңһчд билгтә баахн улс баһ биш бәәнә, тедн олн әмтиг билг-эрдмәрн байрлулхмн, - гиҗ Эрднин Данзн келв.
Балһсна Өдр угтҗ Элстд Манҗин Аркадин нертә талвң, Ленина уульнцд әмтн йовдг хаалһс секгдхмн, «Эхо» бумблвин өөр сән таал тогталһна көдлмш төгсх зөвтә.
ДООҖАН Наталья