Селәнә өөнлә йөрәв

Приютна района Воробьевка селән 150 җилин өөнән темдглв. Эн һазрт кесг үйин тууҗ әрүнәр хадһлгдҗ йовна. 1875 җилд энд селән бүрдәгдҗ орс чонҗ босхгдсмн. Урднь эн Бислүртә гиҗ нерәдгдҗәлә. Хальмг Таңһчин Толһач Хаска Бату селәнә әмтиг ончта өөнлә йөрәһәд, эн һазра баатрмудын нердиг зааһад, бәәдг улсин төрскнч седклин залмҗар Воробьевка селән делгрҗәхиг темдглв.
– Эндр селән делгрҗәнә, энд дунд сурһуль, эмнлһн ясгдҗана, спортын болн бичкдүд нааддг шин талвңгуд тосхгдҗана, паркс шинрүлгдҗәнә. Төрскн отг-әәмгтән эңкр бәәрн улсин төлә Воробьевка селән хамгин эңкр болн өөрхн һазр болхнь маһд уга, – гиҗ Бату Сергеевич йөрәв.
БАТАН Сәәхлә