Ноһан Дәркд нерәдсн парк – Лаганьд

Олн-зүсн үүлдвр амрлһна эн бәәрнд цуг таал цагин некврлә ирлцүлгдҗ күцәгдхм. Бурхн Багшин номд шүтдг олн келн улсин авъясмудын ул деер терүгинь әмтнд сән кевәр амрлһна цуг таалыг тогтадг тосхлтын өдгә цага янз олзлҗ кегдҗәнә. Ик иргчтә соньн эн төсвиг күцәлһнд 120 сай һар мөңгн һарһгдҗана.
Ноһан Дәрк бурхна паркиг бүрдәҗ цуг халхарнь ясрулгдҗ, эдлврт орулхин төлән тускар таңһчин ЖКХ-н болн энергетикин министрин дарук Хактан Сергей зәңглв. Ноһан Дәркин бурхна парк Лагань балһсна әмтнә амрлһна дәкн нег талвңгнь болхмн.
Бурхн Багшин номар соньмсчах әмтн нааран оларн ирхд эн парк эрк биш таасгдх. Әмтнә җирһлд учрдг ямр чигн зовлңгас харсҗ авхдан белн болдг Ноһан Дәркин Бурхна паркд ирсн улст болн гиичнрт чигн эннь евәлтә болхмн. Таңһчд ирҗәх зуучлачнр энд Хальмгин тууҗла, сойлла, шаҗнла болн авъясмудла таньлдҗ чадхмн.
Эрүл-мендән батлхар һар-көлән көндәҗ, олн керг-үүлдврт, усна тогталын көвәд бәәх паркд спортд дурта әмтн бийдән тустаһар цаган давулҗ чадхмн. Келхәс, Көк теңгс тал һарчах усна тогталын өөр спортивн үүлдврин төлә цуг тоотнь бел кегдҗәнә. Тер тоод усн деер болх марһаст чигн орлцҗ болхмн. Бадм цецгин фестивалин йовудт энд нег үлү олн соньн хәләврмүд болн марһас бүрдәгдхмн. Әмтиг олар цуглулдг тер керг-үүлдврмүд энд сән авъяст тохрв.
Паркин дунднь бәәх Ноһан Дәркин бурхна көшән өөр әмтн ирҗ, зальврҗ, амрх таалта болҗана. Төсвин зураһар әмтн спортивн үүлдврт орлцлһна бәәрнс бәәнә. Бичкдүд нааддг орм бас энд бүрдәгдхмн. Әмтн оларн орлцх талвң чигн бәәнә. Терүнднь тәәз болн әмтн суудг ормс бас тәвгдхмн. Керг хоорнд хот ууҗ болх кафе бас тер паркд орман олхмн. Цуг эн тоот хоорндан йовхд эвтә хаалһсар залһлдхмн. Паркур орх үүднә өөр усна турглан углгдхмн. Усна тогталын көвә ясгдҗ, тенд оңһцар, нань чигн усна көлгәр йовхд туста бәәдл тогтагдхмн. Тенд мангалмуд тәвгдҗ, әмтн сууһад амрдг бәәрнс кегдҗәнә. Ноһан Дәрк бурхна паркд ясруллһна көдлмш 2026-2027 җилмүдт күцәгдхмн. Балһсна әмтнд бәәцин сән таал тогталһар зарлгдсн Цугәрәсән марһанд диилвр бәрәд, эн парк ясҗ эдлврт орулх таал учрв. 2022 җилд Лаганьд «Мелодии Каспия» гидг паркиг эдлврт орулҗ чадв. Ода эн парк зуучлачнр олар ирдг тааста бәәрн болв. Хамгин дурта байран – Заһсчин өдриг лаганцнр эн паркд сергмҗин бәәдлд давулна. Лаганя әмтн эврә һазран кеерүлсн деерән таңһчд зуучлһн делгрхд зөвтә тәвцән орулҗана.
ҖИРҺЛИН Кермн