Баһ-Дөрвдә нерән туурулҗ

Түрүн хальмг профессор Бадмин Батан нертә Баһ Дөрвдә гимназь таңһчин сән гисн сурһульмудын тоод орна, сурһульчнрнь таңһчин болн Цугәрәсән марһаст кезә чигн йилһрнә. Гимназин һурвн давхр гериг 1977 җилд тосхла, тегәд ода тәвн шаху җил болад хуучрад бәәсн гериг тосхачнр шинрүләд, эрс-ораһинь шинәс бүркәд таньҗ болшго кевәр сәәхрүлҗ хүврүлв.
Тер ик көдлмш яһҗ күцәгдснә тускар маднд гимназин һардач Баункан Артур тодрхаһар келҗ өгв. «Манад Белгородын «Өдгә цагин эв-арһин төв» гидг фирмин тосхачнр көдлв, цуг көдлмшән эдн сән чинртәһәр күцәв. Тегәд ода мана гимназин һаза-дотакнь сольгдад йостаһар оңдарулгдв.
Тер тоод хот уудг хорад шин кергсл углҗ тәвгдв, терүг ода мергҗлтнр бел кеҗәнә, кабинетмүдт интерактивн самбрмуд, «Точка роста» шин кергсл, партс болн сандлмуд хулдҗ авгдв, ширәс болн Интернет орулгдв, тер кергт маднд района һардвр дөң болв. Цааранднь чигн гимназиг шин мебеляр теткҗәнә.
Ода мана сурһульчнрин болн спортсменмүдин төлә бас сән таал тогтагдв, энд района болн сурһулин марһас бүрдәҗ болхмн гиҗ Артур Менкеевич келв.
Багшнрин төр чигн күцц хаһлгдад уга, ода орс келнә багш болн психолог кергтә. Эн җил баһ наста хойр багш ирв, эдн эсвин болн зәңгллһнә, тер мет тууҗин болн обществознаня кичәлмүд давулх. Эдн бийснь эн гимназь төгсәлә, ода төрскн сурһульдан хәрү ирв. Эднд түрүн саамд сурһмҗлачнр нөкд болад бәәх.
Гимназьд йиртмҗ шинҗллһнә болн номин, тер мет социальн-гуманитарн хойр салвр бәәнә. Ах классин сурһульчнр хальмг келән сәәнәр меднә, кезәңк дуулвр дуулна, төрскн келндән эңкр баһчуд болҗ өсчәнә. Тер кергт эднә эк-эцкнр болн хальмг келнә багшнр ик нилчән күргнә. Тер тоод дамшлтта мергҗлтнр Окна Александра, Джалсана Нина, Акимин Байрта болн Әлксән Александра йовна.
Эн җил гимназиг 47 сурһульч төгсәв. Тер тоод Бамбша Арина, Бембән Амулң, Буван Даяна, Бухан Диана, Окна Дарина, Босхмҗин Кермн, Мучан Дарина, Очра Гилян, Шавһра Алина, Шурбан Амулң, Петькин Эңкр йилһән сәәнәр сурад, алтн медаляр ачлгдв. Тер мет Милена Катина, Боктан Екатерина, Зоя Зейналян, Манҗин Кару ахта цаһан мөңгн медаляр ачлгдсн мөн.
Эн җилин төгсәһәчнр Хальмг ик сурһульд, Аһшин, Москван, Екатеринбургин, Краснодарин, Шарту балһсна ик сурһульмудт орв.
Медрлин Өдрин өмн өргнд Баһ Дөрвдә гимназин биологин багш Эльза Николаевад «РФ-н сурһуль-эрдмин күндтә көдләч» гидг өөдән нерн зүүлһгдв. Зурлһна билг-эрдмин багш Баранга Андрейд болхла Әрәсән гегән-герлин Министерствин Күндллһнә һашг бәрүлҗ өггдв. Тер мет гимназин һардач Баункан Артур Хальмг Таңһчин профсоюзин таңһчин комитетин Күндллһнә һашгар мөрәлгдв.
Цуг багшнриг болн сурһульчнриг, негдгч класст орсн 70 һар бичкдүдиг сурһулин шин җиллә йөрәҗәнәвидн. Гимназин шин герт сәәнәр сурч, Баһ Дөрвдә района болн Хальмг Таңһчин нер туурулҗ йовтн гиҗ йөрәҗәнәвидн.

ТҮРВӘН Һуна
Зургт: алтн болн цаһан мөңгн медальмүдәр ачлгдсн 2025 җилин төгсәһәчнр