Бичкдүдиг сурһульднь белдв

Сурһулин җил угтҗ мана таңһчд «Бичкдүдиг сурһульд белдхд дөң болтн» гидг буйнч седклин керг-үүлдвр давуллһн сән авъяст тохрв. Җил болһн терүнә йовудт баһ тетквртә, олн үртә болн җирһлин күнд таалд туссн өрк-бүлмүдин бичкдүдиг сурһульднь кергтә эд-таврар теткнә, хувц-хунр хулдҗ өгнә.
Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, эн җил 978 сурһульчиг сурһульд белдхин төлә ут тоодан 1426,7 миңһн арслң һарһгдв. Буйнч седклин керг-үүлдврин йовудт демән күргсн улс, арһлачнр болн таңһчин бүрдәцс канцелярск эд-тавр, хувц, башмг хулдҗ авч, баһ тетквртә өрк-бүлмүдт дөңгән күргв. Министерствин медлд үүлддг бүрдәцс «Эврә сән дурар үүлддг улс – бичкдүдт» болн «Бичкдүдиг сурһульд белдхд дөң болтн» гидг керг-үүлдврмүд давулад, таңһчд бәәдг баһ тетквртә өрк-бүлмүдин бичкдүдиг сурһульд белдсн деерән Луганск Улсин Республикин Антрацитовск района күүкд-көвүдт бас килмҗән тусхав. Таңһчин әмтнә социальн харслтын цергллтсин көдләчнр (зургт) бичкдүдт сурһульднь керглгдх канцелярск эд-тавр цуглулҗ йовулв.
БАТАН Сәәхлә