Хальмг кев-янзта хувцн

«Модн» гидг фабрик хальмг зурачнр Хаалһ Поваевала болн Байслң Эдняшевала хамдан «Халга&Модно» гидг төсв белдв. Зурачнр эврәннь зургудан эд деер буулһв. Терүнд хальмг улсин алдр «Җаңһр» дуулврин баатрмуд, хальмг теегин сәәхн йиртмҗ, темәд, гөрәсд зурата. Тер мет зургудыг дахулад тод бичгәр бичгдсн үгмүд бәәнә.
Хальмг келн-улсин кев-янзта хувциг мана таңһчд түрүн болҗ бүрдәгдсн олн зүсн эд-тавр хулддг «Модн» тавлңд хулдҗ авч болҗана. Терүнд мана таңһчин арһлачнр кесн кегдлмүд, эд-тавр хулдгдна. Эн төсв мана таңһчин өвәрциг олнд медүлҗ, келн-улсин кев-янзта хувц хулдҗ авх саната улст дөң болхмн.