Келн-улсин төсвс туста болҗана

«Баатрмуд 08» төсвд орлцачнр сурһулин көтлврин йовудт таңһчин күцәгч йосна бүрдәцсин элчнрлә, Б.Б.Городовиковин нертә Хальмг ик сурһулин номтнрла харһҗ, чинртә төрмүдәр ил күүндвр тогтаҗ, шин медрл хоршаҗ авчана. Сурһулин хөөн эдн таңһчин болн муниципальн бүрдәцст көдлҗ, төрскн һазр-уснаннь делгрлтд тәвцән орулхмн. Шидр Хальмг Таңһчин залврин Ахлач Босхмҗин Гилән цергә шишлң керг-үүлдврин ветеранмудт «Келн-улсин күслмүд болн келн-улсин төсвс» гидг төрәр илдкл кев.
- Сурһулин көтлвр йир соньн, олзта-туста болҗана, өдр болһн гилтә төсвд орлцачнрин төлә олн зүсн керг-үүлдврмүд давулгдна, эдн седвәрән татҗ, соньмсад, шунмһаһар орлцҗахнь темдгтә. Эндр таңһчин залврин Ахлач, юридическ номин кандидат Босхмҗин Гилән мана таңһчд келн-улсин төсвсин йовудт ямр керг-үүлдврмүд күцәгдҗәхин тускар келҗ өгхмн. Мана цергчнр таңһчин социальн-экономическ делгрлтд тәвцән орулхар зүткҗәнә, тегәд эндрк харһлтд босхгдҗадг төр эднд эрк биш соньн болх, - гиҗ Хальмг ик сурһулин һардач Салан Бадм харһлтыг секв.
2019 җиләс авн мана орн-нутгт бәәдл-җирһлд тохрагдҗадг келн-улсин төсвсин йовудт ямаран зөрүллтсәр көдлмш бүрдәгдснә тускар ахрар келәд, Гилән Герасимовна мана таңһч ямаран күцәмҗ бәрсиг онц заав. Тиигәд, 2019-2024 җилмүдт келн-улсин төсвс күцәгдснә ашт таңһчин экономикин кемҗән 87 процентд өсв, көдлмш уга улсин то 2,1 холванд баһрв. Тер мет таңһчин хазна оруһин әңг 2,6 холванд өсснь темдгтә. 2019 җилд келн-улсин төсвс күцәлһнд 15 җува арслң һарһгдсн болхла, 2025 җилд эн кергт 30 җува арслң йилһгдҗәнә. Б.Б.Городовиковин нертә Хальмг ик сурһулин номтнрин орлцлһтаһар белдгдсн таңһчин социальн-экономическ делгрлтин онц көтлврин йовудт 2020-2024 җилмүдт 5 җува арслң йилһгдсн болхла, 2025-2030 җилмүдт 6 җува арслң йилһгдх болв. Эн көтлврин йовудт 3,3 миңһн көдлмшч орм бүрдәгдв, 2030 җил күртл дәкәд 1,5 миңһн орм бүрдәгдхмн гиҗ зуралгдҗана. Эн көтлврин хойрдгч девсңгин йовудт 9,7 җува арслңга инвестиц орулгдхмн. Мана таңһчд 75 шин бүрдәц экләд үүлдв, үлгүрлхд, өлг-эд, һуйрин кегдлмүд кеҗ һарһдг бүрдәцс көдлҗәнә.
Эн җил келн-улсин төсвсин керг-үүлдврмүдт 10 җува арслң һарһгдхмн. Ода таңһчд эрүл-менд харлһна, сурһуль-эрдмин, социальн бүрдәцсин, усна сурвлҗна болн нань чигн халхар тосхлтс болн ясврин көдлмш кегдҗәнә. Таңһчин 57 сурһульд бат ясвр кегдв, эн җил түрүн болҗ хойр бичкдүдин сад шинрүлгдҗәнә. Ирх җилд дәкәд зурһан, хойр җил давад арвн бичкдүдин садт бат ясвр кегдхмн. Эн җил хотл балһснд Шапшукован нертә уульнцд өдгә цага шин сурһуль экләд тосхгдхмн, терүнд 2 җува арслң олзлгдх. Дәкәд Элстд медәтнрин болн эрмдгтә улсин гер-интернатд немр бәәр тосхлһнд бас 2 җува арслң һарһгдхмн. Эн җил Үстин района эмнлһнд бат ясврин көдлмш төгсхмн, нидн тенд поликлиник шинрүлгдсн билә. Өдгә цагт Приютное селәнд бас поликлиник тосхгдҗана. Хаалһс болн тагтс ясгдҗана, хуучрад нурҗадг гермүдәс әмтиг нүүлһҗ авхин төлә бас шин гермүд эдлврт орулгдҗана. Цуг эн керг-үүлдврмүд әмтнә җирһлин таал ясруллһнд, дорас өсч йовдг баһ үйнрин билг-эрдм делгрүллһнд, медәтнрт сән таал тогталһнд туслҗана, - гиҗ Гилән Герасимовна цәәлһв.
«Баатрмуд 08» төсвд орлцачнр таңһчин залврин Ахлач келсиг оньган өгч соңсад, эдниг соньмсулҗадг төрмүдәр сурврмудан өгв. «Төрскн һазриннь делгрлтин төлә иим чинртә керг күцәхин төлә даавртаһар, үнн-чик седклтәһәр көдлх кергтә. Таңһчин Толһач Хаска Батун һардврт көдләд, нег һазра улсин сә хәәлһнә туст зүткҗәдг улс тадн болҗанат», - гиҗ таңһчин залврин Ахлач товчлв.
БАТАН Сәәхлә